Nganong dili mabasura
Bisan sa pagbadlong ni Presidente Ferdinand Marcos Jr. sa impeachment ni Bise Presidente Sara Duterte, nga gisundan dayon sa pag-distansiya sa mga kongresista sa administrasyon sa impeachment proceedings, walay kapilian ang liderato sa House of Representatives gawas sa pag-suporta sa impeachment complaint nga napasaka niadtong Lunes sa gahapon nga mahimong masundan og mas daghan pa.
Kay ang impeachment maoy bunga sa mga imbestigasyon nga ilang gipasiugdahan. Kon ilang yak-an, mausik ang minilyon ka pesos sa buhis sa katawhan nga gasto sa ilang public hearings. Ug kadudahan ang tinuod nilang katuyoan.
* * *
Mahimong dili sila sama kapaspas sa House sa 2011 nga ang pagpasaka, pag-endorse ug pag-aprobar sa impeachment complaint batok ni Chief Justice Renato Corona nahitabo sulod lang sa usa ka adlaw (gisundan sa upat ka buwan nga impeachment trial sa Senado nga niresulta sa pagka konbikto ug pagkalagpot sa puwesto).
Pero dili angayng babagan ang impeachment sa pamolitika–kay walay seguro mo-kobikto bang 16 ka senador. Kon mahadlok ang reelectionists nga mawad-an sa Mindanao votes, pahinumdoman nga ibasura sila sa mas daghang botante gawas sa Mindanao kon duphan si Duterte.
* * *
Mag-piyesta ang Duterte trolls kon ibasura sa House ang impeachment complaints. Pasanginlan nilang mayoriya sa mga kongresista nga wala motuo sa mga ebidensiya nga nahipos sa ilang kaugalingong imbestigasyon.
Makabuylo sa pangangkon nga walay balaod nga nalapas si Duterte ug biktima lang sa bangis nga pagpanggukod. Makapanulisok sab nga ang tinuod nga sad-an sa kaguliyang mao ang tambaloslos nga ni-abuso sa gahom aron matuman ang ambisyon nga mag-presidente sa 2028.
* * *
Bisan sa pagtibugsok sa ratings ni Duterte sa sunudsunod nga nasudnong surveys, nabalaka gihapon ang Malakanyang nga ang impeachment makapasuko sa iyang mga dumadapig, makaaghat nila sa pagtapok sa Edsa ug pagpalayas ni Marcos Jr. sama sa iyang amahang diktador.
Dili mabasol ang mga Marcos nga mahadlok sa ilang anino. Bisan kinsa na man sab tingali nga nagtipig og kinawat nga katigayonan ug P203.8 bilyones nga utang sa estate tax dili sab mahimutang. Maong makatabang sa mga Marcos kon kalimtan lang una ang plano sa pagpabilin sa gahom lapas sa 2028 ug ipatuman ang balaod bisan kinsay hingtungdan ug bisan kinsay maig-an.
* * *
- Latest
