EDITORYAL - Diplomatikong relasyon

Ang diplomatikong relasyon sa Pilipinas ngadto sa ubang mga kanasuran dako kaayo og kapuslanan dili lang para sa gobiyerno kundili apil pud sa katawhan niini. Napamatud-an nga human sa Ikaduhang Kalibutanong Gubat,  ang diplomasya dako og natabang pagpakgang sa pag-ulbo og balik sa lain napud susama kalapad nga gubat.

Apan kining maayong pakigrelasyon dili lamang kini kabahin sa mga estado, pwede kini mapuslan sa indibidwal nga tawo. Mao nga dakong sayup para sa usa ka nasud nga manghimaraut sa ubang mga nasud ug manghambog nga kaya ra niini mag-inusara, labaw na nga dakung sayup kun mamili og nasud nga gustong amiguhon.

Ning bag-o, 220 ka mga Overseas Filipino Workers nga nabilanggo didto sa United Arab Emirates ang gihatagan og pardon sa gobiyerno sa maong nasud niadto lang Disyembre 26, apan karon lang buwana gipahibalo dinhi sa Pilipinas.

Dili lang sila maoy nahatagan og bag-ong paglaum, kay niadtong bulan sa Hunyo sa miaging tuig gihapon kapin sa 100 ka OFWs sab nga detainees didto ang gi-pardon.

Sa miaging buwan sab, gihataga sa gobiyerno sa Indonesia ang dul-an 15 ka tuig ng hangyo sa Pilipinas nga ibalhin og bilanggoan dinhi sa nasud ang death row convict nga si Juvy Veloso.

Dili masukod ang kalipay sa mga pamilya aning tagsa- tagsa ka mga OFW nga makagawas na sa prisohan. Mahunong na ang ilang kabalaka kung unsa ang kahimtang sa ilang mga kabanay nga nangapriso sa abroad. Mao nga importante sa mga lider sa nasud nga maghunahuna kanunay og mga estratehiya ug mga pamaagi nga magpabilin ang maayong relasyon ug imahe sa nasud nga di masakripisyo ang kinabag-an.