Hait nga hagit

Hugaw na kaayo ang dula sa mga kongresistang bias (hinuon dili tanan) sulod sa Kongreso diha sa ilang pagtratar og mga resource person, kinsa ilang giimbitar aron pinaagi sa ilang pag-imbestigar may mapupo silang bunga nga makatabang unta sa pagpanday og mga maayong bag-ong balaod alang sa kaayohan sa tanan. Apan dili maoy nahitabo.

Kay nauso! Nga kon ang resource person, kinsa giplanohan nilang pisakon, bisan nagtug-an pa kini sa tinuod, kon dili mahisubay ang tinubagan niini sa gihuptan nilang “Let’s stick to the plan’s script”, ila dayong duladulaan sa pasukosuko ug hadlokon nga ipa-cite in contempt. Ug ubay-ubay intawong mibarog sa kamatuoran subay sa atong Batakang Balaod ang nabiktima sa ilang kaabusado. 

Abogada si Bise Presidente Sara ‘Inday’ Z. Duterte. Ug wala malilong kaniya kining inhustisyang pamaagi sa Kongreso. Sanglit siya mismo, nakasinati niini sukad pa niadtong 2022 confidential funds issue hangtod sa 2025 OVP budget hearings, diin bisan unsa na lang ang mga hugawng paagi nga giumol sa mga hingtungdang komite aron makitaag hinungdan nga ma-impeach si Inday.

Pero bisag gitabangan pa siya paggukod-paghot sa mga kongresista, bisan gamay wala siya mahadlok. Hinunoa, migawas ang tiunay'ng kaisog sa usa ka dugong Duterte.

September 18, 2024, ikatulong 2025 OVP Budget hearing sa Kongreso, hait kaayo ang mga mata sa agila sa Mindanao nga mipasidaan:

“So, you may try to destroy me? You can skin me alive and throw my ashes to the wind. But let it be known, you will find me unbowed.”  I will not allow myself to be subjected to an inquiry based on an empty privilege speech, just so that you can attack me, and do indirectly what you failed to do directly during the budget hearings.”

Pastilan, pagkahait nga hagit! Tiaw bay, mapanitan man si Inday sa mga tambaloslos ug isaliyab ang iyang abo sa kahanginan, apan dili mahitabo nga siya ilang mapayukbo-mapasurender! 

Resign-impeach, Sara? No way! Kay matud pa ni Inday, magpabilin siya sa puwesto tungod kay katawhan (32M kapin) maoy mibutang niya dinhi aron alagaran ang atong nasod. Diin, sa paglingkod pa lang niya, maoy iyang gibuhat.

Malupig kaha nila si Inday? Or silay malupig? Ato ning atngan!