Oktubre 2 ang Paghandum sa atong mga Anghel nga Magbalantay

Pagbasa gikan sa Ebanghelyo ni Mateo (Mt. 18;10)

Pagmatngon sa dili pagtamay ning mga gagmay’ng bata, sultihan ko kamo nga ang ilang mga anghel sa langit nagtan-aw kaniya sa nawong sa akong Langitnong Amahan….

PAGPASABOT

Gibuhat ang tanan makita ug dili makita (Col. 1;16)

Ang mga anghel gikan sa pulong anggelos kun sinugo sa Dios kun mensahero ngadto sa mga tawo. Mao kadtong linalang nga sama natong mga tawo nga dunay salabotan, kahibalo, ug kagawasan (Will, knowledge, Free Will) apan lunsay nga Espiritu. Naila sila segun sa ilang buhat kun tahas.

Kasinatian sa uban sa Anghel diha sa Balaang Kasulatan

1. Si Arkanghel Gabriel nipahibawo nga matawo ang mesiyas (Lk. 1;26)

2. Usa ka bagang panon sa mga anghel nipakita sa mga magbalantay sa karnero sa dihang natawo ang mesiyas (Lk. 2;13)

3. Usa ka anghel nipakita kang Jose diha sa iyang damgo aron mokagiw sila ngadto sa Ehipto kay patyon ni Herodes ang bata nga si Jesus (Mt. 2;13)

4. May mga anghel nga nialagad kang Jesus human siya tentala sa yawa sa bisan unsang paagi (Mt. 4;11)

5. Ang ang mga anghel mokuyog kang Jesus sa adlaw sa Panghukom (Mt. 25;31)

Ang mga Arkanghel

Sila ang maisip natong mas labaw sa mga angheles ug mga sinaligan sa Dios. Sa Balaang Kasulatan dunay tulo ka mga Arkanghel sila mao kining mosunod:

Rafael ang arkanghel nga nikuyog kang Tobias sa iyang panaw ug nihingilin sa demonyo nga si Asmodeus. Ang iyang ngalan nagpasabot og Kaayohan sa Dios kun God’s Healing. Patron sa mga magpapanaw, ingon man sa mga buta ug mga masakiton. (Ang Basahon ni Tobit nag-asoy niini)

Gabriel ang nipahibalo ngadto kang Maria nga mamahimo siyang Inahan sa Dios nga nagpakatawo. Ug kang Zacarias nga pari nga naamang kay wala dayon motuo nga si Isabel iyang asawa manamkon ug manganak. Patron siya sa Telecommunications.

Miguel  ang iyang ngalan nagpasabot og “Who is Like God?” kun kinsay sama sa Dios? Siya ang pangulo sa mga kasundalohang langitnon nga nitambog sa impiyerno sa mapahitas-ong Lucifer kuyog sa mga sakop niini.

Atong Sangpiton ang atong mga Anghel nga Magbalantay diha sa:

1. Sa atong pagbangon matag buntag, sa atong pagpanaw ug sa dayon natong katulog.

2. Panahon sa Misa diha sa Gloria (Himaya) ug sa Santos.

3. Sa panahon kun atong nasinati nga dunay mga dautang Espiritu nga nagpalibot ug nanghasi kanato. Gamhanan man tuod ang yawa apan mas gamhanan ang mga anghel sa Dios. Matud pang San Benito sa Nursia ang atong mga anghel nga magbalantay maoy motaho kun mo-report ngadto sa Dios sa mga butang nga atong gipanghimo.

Ang mga anghel atong mga higala busa ato silang sangpiton sa kanunay.