Gugmang simang

Makahinuklog! Niining pagpamalik pagdagsang sa ginadiling drugas, diin bisan halos matag adlaw kinilo niini madakpan sa mga otoridad pero inay mahurot misamot hinuon kaabunda, hinungdan nga mitaas na sab ang mga kasong kriminal, tilimad-on uroy kini nga nagkaanam nag kadaghan ang linalang, kinsa nagpalayo na sa Ginoo.

Hasta kaso sa paghikog nauso na. Diin, gidudahan nga pipila kanila, sa higayong hasmagan sa suliran bahin sa pamilya, pag-eskuyla, panrabaho o love life, modangop na lang sa paghingos og shabu nga maoy magtukmod kanila sa pag-ambak gikan sa habog kaayong taytayan o bilding.

Kapila na ba kita makabalita nga adunay naghikog tungod sa suliran sa gugma? Dinhay maanyag dalaga nga tungod sa iyang dakong gugma sa lalaki, mihatag sa iyang tanan bisan wala pa sila makasal.

Enjoy kaayo sila sa pre-marital sex hangtod miabot ang higayon nga nabuntis siya. Diin, mao pay pagkahibalo niya nga minyo diay ang lalaki ug duna nay mga anak.

Ang sakit, kay iyang parents ligdong. Nagtudlo sa kasagrado sa moral values sa kinabuhi kanilang mga anak sukad sa bata pa sila. Hinungdan, naglibog siya unsaon pagsulti kanila bahin niini?

Gikaulaw niya ang maong hitabo. Gikaguol-gikasakit-gikahasol kaayo. Hinungdan, naghikog-nagpakamatay aron matapos ang tanan.

Apan natapos ba?  May lain bayang kinabuhi human sa atong kamatayon dinhi sa kalibotan. Inig kamatay nato, sa ikatulong adlaw, mosaka ta sa langit aron moatubang sa Ginoo, kinsa mangutana giunsa nato paggamit ang kinabuhi nga Iyang gihatag kanato?

Gisunod ba Iyang balaod nga mao ang paghigugma nato Kaniya sa tibuok tang kasingkasing, hunahuna ug kalag?

Gihigugma ba atong isig ka tawo sama sa atong kaugalingon? Kay kon kita pakyas, segurado, impiyerno gyoy atong mapuntariyahan.

Hinungdan, ang paghikog bisan pag tungod sa dakong gugma ngadto sa imong uyab, kini usa gayod ka dakong sala.

Sanglit usa man kini ka matang sa gugmang misimang-nakasupak sa duruha ka kinatas-ang sugo sa Diyos nga mao ang tinuorayng gugma nga kanato makapa-Langit!

Busa, oras nga sulngon ka, Brod-Sis, sa mga grabing problema, diin sa imong tan-aw wala nay kasulbaran, ayawg dangop sa ilimnong makahubog o drugas nga makayabag. Hinunoa, duol sa Ginoo, balik Kaniya.

Kay hagbay ra Siyang nagpaabot kanimo aron ikaw Iyang tabangan.