Lady SUV driver pumasok sa bus lane
Nagpakilalang pamangkin ng heneral
MANILA, Philippines — Hindi pa nagbibigay ng anumang komento si Philippine National Police-Directorate for Plans (PNP-DP) Director Police Major General Mario Reyes hinggil sa paggamit sa kanyang pangalan ng isang babae na sinita at hinarang dahil sa pagpasok sa busway kamakalawa ng gabi sa Makati.
Nabatid na nagpakila ang babaeng driver ng SUV na pamangkin siya ni Major General Reyes kaya sinubukan ng mga mamamahayag na kunin ang panig nito kung totoo ito.
Nag-viral na sa social media ang video kung saan nagpakilala pa ang babae na miyembro ng Intelligence Service ng Armed Forces of the Philippines (ISAFP) at kabilang sa Balikatan Exercise.
Base sa Facebook post ng Special Action and Intelligence Committee on Transportation (SAICT), makikita sa video ang isang babae na nakasakay ng SUV na lumabag sa pagpasok sa bus lane. Tumanggi ang babae na isuko ang kanyang lisensya matapos na magpakilalang pamangkin ni Major General Mario Reyes at isa umano siyang major ng ISAFP, at kalaunan ay pinasibat na palayo ang kanyang sasakyan sa mga walang magawang enforcers.
Ayon kay AFP Public Affairs Office chief Col. Xerxes Trinidad, hindi nila kukunstintihin ang anumang pagkilos ng kanilang miyembro na labag sa batas at nakakasama sa imahe ng organisasyon.
- Latest