Holdaper kumasa sa parak, todas!
MANILA, Philippines – Isang holdaper ang napatay habang isa pa ang naaresto matapos manlaban sa mga nagrespondeng pulis nang holdapin nila ang isang lolo sa Pasig, kahapon ng umaga.
Kinilala ang napatay na suspek sa pamamagitan ng identification card na nakuha sa kanyang wallet na si Rodel Gamaro, nasa hustong gulang, habang nadakip si Jezreel Bierra na residente ng Cainta, Rizal.
Nabatid kay Sr. Supt. Elmer Jamias, director ng Eastern Police District (EPD), dakong alas-10:30 ng umaga nang maganap ang barilan sa pagitan ng dalawang pulis at dalawang holdaper sa kahabaan ng Dr. Sixto Avenue, Barangay Caniogan sa lungsod.
Bago ang engkwentro ay hinoldap ng mga suspek na lulan ng isang motorsiklo, ang biktimang si Rogelio Tabios Sr., 66, ng 370 Dr. Sixto Antonio Ave. at sapilitang inagaw ang kanyang gintong bracelet na nagkakahalaga ng P50,000 habang may nakatutok na baril.
Napadaan naman sa lugar sina PO2 Jay Laila, ng PCRG Camp Crame kasama si PO2 Catherine Capinpin, na kapwa nakatalaga sa Public Information Office ng EPD, na mabilis na nagresponde sa krimen.
Tinangka nina PO2s Laila at Capinpin na pigilan ang dalawang suspek pero agad silang pinaputukan na maswerte naman hindi tinamaan kaya sila gumanti ng putok na nagresulta para tamaan at mahulog sa motorsiklo ang rider na holdaper habang ang driver ng motor ay nakatakas kaya isinagawa ang hot pursuit operation.
Matapos ang habulan at follow up operation ay nadakip din ito sa Bgy. Palatiw, Pasig City.
Isinugod pa sa Ri-zal Memorial Center si Gamaro ngunit idineklara na itong dead on arrival ng mga doktor.
- Latest
