Rollback uli sa presyo ng petrolyo

MANILA, Philippines - Muling nagpatupad ng rollback ng kanilang pro­dukto ang isang kompanya ng langis.

Sa abiso kahapon ng Pe­tron, base sa ipinadalang text message ng kanilang Media Affairs, ngayong araw na ito,  Setyembre 9, ipapatupad ang  rollback sa ilan nilang produkto at epektibo ito, alas-12:00 ng madaling-araw.

Para sa diesel,  nasa P0.25 kada litro ang ibinaba at ang kerosene naman ay nasa P0.10 kada litro. Ito ay bunsod aniya ng paggalaw ng presyo sa world market­ at inaasahang  susunod na rin  ang iba pang oil companies para sa rollback.  

Matatandaan, na noong nakaraang buwan ay pitong beses na sunud-sunod na nagbaba sa presyo ng mga produktong petrolyo ang ilang oil companies at ang pinakahuli nga ay noong Agosto 19.