4 sugatan sa pamamaril sa Pasay

MANILA, Philippines - Apat katao ang malubhang nasugatan matapos ang ginawang pamamaril ng riding-in-tandem, kahapon ng madaling araw sa Pasay City. Kinilala ang mga biktimang sina Saddam Cerera, isang vendor; Ricky Geraldino, 34; Aron Dominique Talban, 23 at   Fred Belogot.

Sa report na nakarating sa tanggapan ni Police Chief Inspector Angelito De Juan, hepe ng Station Investigation and Detective Management Branch (SIDMB), Pasay City, naganap ang insidente alas-3:20 ng madaling-araw sa may  EDSA Zone 15, Brgy. 142 ng naturang lungsod.

Nabatid, na nakikipaglaro si Cerera ng cara y cruz sa ilang kalalakihan at naroon din ng oras iyun ang tatlo pang biktima nang dumating ang isang kulay itim na motorsiklo na walang plaka lulan ang mga suspek.

Walang sabi-sabing pinaulanan ng mga salarin ng bala ng baril ang mga naglalarong biktima kung saan napuruhan si  Cerera.

Mabilis namang nagsitakas ang mga suspect. Iniimbestigahan pa ng pulisya ang nasabing pamamaril at inaalam na rin ang motibo nito.