Amerikano sinamurai ng addict
MANILA, Philippines - Patay ang isang Amerikano makaraang masaksak gamit ang isang samurai ng isang 29-anyos na lalaki na nahulihan pa ng mga paraphernalia ng iligal na droga, kamakalawa ng gabi sa Makati City.
Nalagutan ng hininga dahil sa malalim na saksak sa katawan ang biktimang si Robert Trotter, pansamantalang nanunuluyan sa no. 2963 General Del Pilar Street, Brgy. Bangkal, ng naturang lungsod.
Nasakote naman ng mga rumespondeng mga barangay tanod at pulis ang suspek na nakilalang si Gerald Gelera, ng no. 5051 Malolos Street, Brgy. Olympia, ng naturang lungsod.
Dakong alas-9 kamakalawa ng gabi nang maganap ang krimen sa ikaapat na palapag ng condominium building na tinutuluyan ni Trotter sa General del Pilar Street.
Ayon sa obrerong si Dennis Ancajas, humingi sila ng responde at naabutan ang biktima na sinasaksak ng suspek.
Nakuha pa sa posesyon nito ang tatlong stick ng marijuana, dalawang tooter, at samurai na ginamit sa pamamaslang.
Nahaharap naman ito ngayon sa kasong murder at paglabag sa Dangerous Drugs Act of 2002.
- Latest
