Pamilyang Cudia dudulog uli sa Korte Suprema

MANILA, Philippines - Babalik sa Korte Suprema ang pamilya ng dinismis na Philippine Military Aca­demy (PMA) Cadet Aldrin Jeff Cudia para hilingin na aksiyonan ang kaso ng hindi nito pagka-graduate bilang kadete ng akademya nga­yong taon.

Sa ginanap na press conference sa Public Attorney’s Office (PAO) office sa QC, inamin ng pamilya Cudia na muli silang nagsa­lita ngayon kaugnay ng isyu dahilan sa wala silang natatanggap na pagkilos dito ng pamahalaan.

Binigyang diin ni Ginoong Renato Cudia, ama ng kadeteng si Cudia na hindi sila makakapag-move-on dahil nakalagay sa transcript of record ng kanyang anak ay indefinite leave lamang at walang proper closure.

Hiling pa ng pamilya na tapusin na sa lalong mada­ling panahon ang reinvestigation ng Armed Forces of the Philippines hinggil sa na­turang isyu.

Matatandaang si Cudia ay hindi nakasama sa mga nagsipagtapos ngayong taon sa hanay ng mga graduates­ sa PMA Siklab Diwa Class 2014 dahil sa isyu ng uma­no’y pagsisinungaling nito.