Takot sa meningo: Paaralan sa Mandaluyong, hindi pinapasukan ng mga mag-aaral

MANILA, Philippines - May tatlong araw na umanong hindi nagsisipasok ang mga estud­yante ng Highway Hills Integrated School sa Mandaluyong City sa takot na dapuan sila ng sakit na meningo­coccemia.

Ito’y kasunod na rin nang pagkamatay ng isang Grade 3 pupil ng paaralan kamakailan na sinasabing nasawi dahil sa naturang sakit.

Nabatid na sa mahigit 3,000 mag-aaral ng paaralan ay mahigit 100 lamang ang pumapasok sa klase matapos na mismong mga magulang na ng mga bata ang nagpa-absent sa kanila.

Kaagad namang nilinaw ni Dr. Pecos Camarines, City Health Officer ng Mandalu­yong City, na walang dapat ikabahala ang mga magulang at mga estudyante.

Aniya, batay sa isi­nagawang pagsusuri ng Department of Health (DOH) sa mag-aaral ay hindi naman meningococcemia ang ikinasawi nito.

Kaugnay nito, nag-iikot na ang mga opis­yal ng paaralan upang himukin ang mga ma­gulang na payagan nang magsipasok ang kanilang mga estud­yante dahil wala naman na umanong dapat ipangamba ang mga ito.

Inaasahang magsa­sagawa rin ng fogging activities ang pamu­nuan ng paaralan para tiyaking ligtas sa anumang bacteria o virus­ ang paaralan para sa ikapapanatag ng mga magulang ng mga estudyant­e.

Nabatid na ilan sa sintomas ng meningococcemia ay lagnat, pananakit ng ulo, an­xiety, pagiging iritable, pananakit ng muscle, pagkahilo, pagkakaroon ng rashes, at pag­durugo sa ilalim ng balat.