MANILA, Philippines – Umaabot sa 70 menor-de-edad na Koreano ang ipatatapon palabas ng bansa at inilagay sa immigration blacklist matapos na mahuli ng Bureau of Immigration (BI) na nag-aaral sa Pilipinas nang walang kaukulang permits kasama ang iba pang Koreano na umano’y responsable sa pag-aayos ng papel ng mga bata upang makapasok sa bansa.
Sinabi ni Immigration officer-in-charge Ronaldo Ledesma, ang mga menor-de-edad ay nasakote ng BI Intelligence operatives noong Enero 7 sa loob ng English language learning center sa Fantasy World resort grounds sa Lemery, Batangas na ino-operate naman ng 7 matatandang Koreano.
Ang nasabing mga menor-de-edad umano ay walang kaukulang Special Study permits (SSPs)na kailangang kunin ng mga dayuhang menor sa BI bago mag-enroll sa anumang eskuwelahan sa Pilipinas. Nilinaw naman ni Ledesma na ang mga menor ay kaagad pauuwiin sa kanilang bansa at ilalagay ang kanilang mga pangalan sa immigration blacklist.
Bukod sa 70 menor-de-edad, ipatatapon din ang 7 matatandang Koreano dahil sa illegal na pag-ooperate dito sa Pilipinas ng language school nang walang kaukulang permiso mula sa BI.
Anim sa pitong Koreans ang kinilala ni Ledesma na sina Hye Young Kim, Myeong Sun Jeon, Ji Yeoun Lee, Bac Chang Tin, Kim Gie Sou, at Moon I Ho, na mayroong mga hawak na tourist visas.
Samantala, si Kwang Ye Lee ay iniulat na mayroong permanent resident visa subalit kakanselahin din ito dahil sa paglabag sa kondisyon ng pananatili nito sa bansa.
Ang pagkakaaresto sa mga Koreano ay bunsod sa reklamo ng jueteng whistleblower na si Sandra Cam dahil sa illegal na pag-ooperate ng language center kung saan ginagamit nitong pangalan ay Nazareth Institute of Alfonso.