MANILA, Philippines – Hindi na nagawa pang makapag-celebrate ng Noche Buena ang isang 46-anyos na babae nang pagsasaksakin at mapatay ng kanyang live-in partner sa loob ng kanilang bahay sa Sampaloc, Maynila ilang oras bago mag-Pasko.
Pinaghahanap na ng pulisya ang suspect na si Danilo Mendoza, 37-anyos na mabilis na tumakas matapos ang pananaksak.
Duguan namang isinugod sa UST Hospital ang biktimang si Lilibeth Quizon, ng Musa St. Sampaloc, Maynila subalit namatay din habang nilalapatan ng lunas makalipas ang ilang oras.
Sa ulat ni SPO2 Henry Ignacio, dakong alas-9:00 ng gabi nang marinig umano ng landlady na si Nena Llavore ang pagmumurahan ng biktima at suspect sa inuupahang kuwarto ng mga ito na nasa ika-3 palapag ng nasabing bahay.
Nang bumaba na umano ang suspect at usisain sa pag-aaway ng dalawa, sinabi lamang ng suspect na sinampal niya ang kalive-in.
Duda umano si Llavore kaya naisipang silipin ang silid at doon niya natiyak na ang pananahimik ng babae ay dahil sa duguan at nakahandusay ito sanhi ng mga saksak sa katawan kaya mabilis niya itong dinala sa ospital.