MANILA, Philippines - Kahit nakapiit sa Manila Police District-Station 5, mariin pa ring kinondena ng tour guide na si Carlos Celdran ang mga pari na mistulang mga ‘prayle’ umano ng nobela ni Dr. Jose Rizal sa Noli Me Tangere.
“Nakakatakot ang precedent na ito, na they have the power to put people in prison like the time of Jose Rizal. If you protest against the church and the bishops, you get hauled to jail. It sends a very scary message to Filipinos when priests can put you in jail,” ani Celdran.
Iginiit niya na karapatan lamang niya na iparating sa mga pari ang kaniyang mensahe sa pakikialam ng Simbahang Katoliko sa paggamit ng contraceptives nang iladlad ang placard na may nakasulat na “Damaso” habang nasa gitna ng pagmimisa.
Nilinaw niya na isa siyang Katoliko subalit nadidismaya siya sa posisyon ng Simbahan sa anti-women’s rights, anti-gay rights at anti-human rights sa panghihimasok sa reproductive health.
Umamin si Celdran na namumudmod siya ng libreng contraceptives sa mahihirap na komunidad lalo na sa mag-asawa tulad ng pills at condom at kung may budget umano siya ay inaalok din niya ang mga babae ng ligation.
“Yes, I give away contraceptives such as condoms and pills to informal settlers at the Intramuros. I don’t force them to take it. I just give them a choice. Kung may budget, I even offer ligation,” aniya pa.
Nakalaya na rin si Celdran, ito ay matapos na magpiyansa P6,000 bunsod ng paglabag sa Article 133 ng Revised Penal Code.