MANILA, Philippines - Isang opisyales ng barangay ang nasawi makaraang pagbabarilin ng riding-in-tandem suspect sa lungsod Quezon kahapon ng umaga.
Apat na tama ng bala, ang tumapos sa buhay ng biktimang si Gil Corpuz, 50, area monitoring officer ng Brgy. Commonwealth at residente sa Kasunduan St., sa lungsod. Mabilis namang tumakas ang mga suspect sakay ng isang Yamaha motorcycle na walang plaka.
Sa inisyal na ulat ng pulisya, nangyari ang insidente sa may kahabaan ng Katuparan St., corner Katibayan ng naturang barangay ganap na alas-9:10 ng umaga. Bago ito, kadadalo lamang umano ng biktima sa flag raising ceremony sa kanilang barangay at papauwi na sakay ng kanyang tricycle (2426-EC) nang biglang harangin ng motorsiklo ng mga suspect at pagbabarilin.
Matapos ang pamamaril ay agad na nagsitakas ang mga suspect habang ang biktima ay nagawa pang maisugod sa Fairview General hospital, ngunit makalipas ang ilang minutong gamutan ay idineklara itong patay.
Hinala ng pulisya na may kinalaman sa agawan sa lote ang ugat ng nasabing pamamaril bagay na iniimbestigahan ngayon ng mga awtoridad.