MANILA, Philippines - Nakaligtas sa tiyak na kamatayan ang isang 23-anyos na lalaking nurse makaraang makahulagpos sa pagkakabigti at pananaksak ng dating misis at lover nito sa loob ng hotel sa Pasay City, kahapon ng madaling-araw.
Nagpapagaling ngayon sa ospital dahil sa tinamong tama ng saksak sa iba’t ibang bahagi ng katawan at marka ng pagkakabigti sa kanyang leeg si Mark Raeniel Salartin ng 2715 Bautista Street, Punta Sta. Ana, Maynila.
Kapwa nakapiit ngayon sa himpilan ng pulisya ang mag-lover na na sina Jennifer Panganiban ng 109 Urbano Velasco Ave. Pinagbuhatan, Pasig City at Ramon John Edward Pla cido, 23, ng Blk. 132 City Homes 2 San Francisco Street, Mandaluyong City.
Sa ulat ng pulisya, naganap ang krimen pasado alas-3 ng madaling-araw sa loob ng Shogun Hotel sa Pasay City.
Nabatid na nakipagkita si Panganiban sa hiniwalayang asawa na si Salartin sa Room 516 upang pag-usapan ang kanilang problema.
Napag-alamang nakipaghiwalay ang babae kay Salartin dahil sa hindi pagkakaunawaan sa maraming bagay kung saan nakisama naman si Panganiban kay Placido.
Nabatid na nanggugulo si Salartin sa relasyon ng dalawa kung saan nais makuha muli ang asawa.
Sa loob ng motel, habang naghahalikan ang dating mag-asawa, biglang pumasok si Placido at pinuluputan ng nylon cord ang leeg si Salartin.
Nagawa namang manlaban ng biktima kaya ito pinagsasaksak ni Placido at kinaladkad sa loob ng banyo.
Sa kabila nito, nagawa pa ring makahulagpos ni Salartin kay Placido at makalabas ng kuwarto. Agad namang nadakip ng mga security guard ng motel sina Placido at Panganiban na kapwa nahaharap ngayon sa kasong frustrated homicide.