MANILA, Philippines - Makaraang tumanggi na ibigay ang kanyang cellphone, isang 21-anyos na lalaki ang binaril at pinatay ng mga holdaper sa harap ng kanyang nobya kahapon ng madaling-araw sa Caloocan City.
Dead-on-arrival sa President Diosdado Memorial Medical Center (PDMMC) si Joseph Chua, ng no. 38-D L. Nadurata St., 6th Ave., ng nasabing lungsod sanhi ng tinamong tama ng bala ng baril.
Batay sa imbestigasyon naganap ang insidente dakong alas-2 ng madaling-araw sa kahabaan ng L. Nadurata St., kanto ng 8th at 9th Avenue.
Naglalakad ang biktima kasama ang kasintahan na si Catherine Quiling nang biglang harangin ng dalawang hindi nakilalang salarin na armado ng patalim at baril.
Agad na nagdeklara ng holdap ang mga suspect ngunit nanlaban ang biktima na naging dahilan upang barilin ito ng una.
Isang manhunt operation naman ang isinasagawa ng mga awtoridad upang matukoy at madakip ang dalawang hindi nakilalang suspect na mabilis na tumakas matapos ang pamamaril.