MANILA, Philippines - Palalakasin ni Quezon City Vice Mayoralty candidate Joy Belmonte ang urban gardening o paghahalaman sa lunsod sa pamamagitan ng kanyang Ilaw ng Bayan Foundation at QC Ladies Foundation.
Ito ang nabatid na isa sa mga programang binabalangkas ni Belmonte para sa mga mahihirap na residente ng lunsod lalo na sa mga kabataang hindi makapag-aral at sa mga ina na walang hanapbuhay.
Sa programa ng urban gardening, tututukan nito na magkaroon ng kaalaman sa ibang mapagkakakitaan ang mga out-of-school youth at mga nanay na walang hanapbuhay.
Sinabi ni Belmonte na mas mainam na mabigyan ng kaukulang hanapbuhay ang mga residente ng lunsod na nasa bahay lamang para makatulong sa pamilya sa gastusin sa araw-araw na pamumuhay.
Alinsunod anya sa kanyang programa dito, mamimigay ang foundation sa mga residente ng mga buto ng iba’t ibang halaman para maitanim sa kanilang mga bakuran at kaukulang seminar kung paano ito aalagaan at mapaparami upang kumita mula rito.
Bukod pa rito ang kaalaman sa ibang puwedeng pagkakitaan tulad ng paggawa ng sabon, basket at iba pa. (Angie dela Cruz)