MANILA, Philippines - Labimpitong saksak sa katawan ang tinamo ng isang 22-anyos na pedicab driver dahil sa matinding selos ng kapwa pedicab driver sa Sta. Cruz Maynila, kahapon ng madaling-araw.
Hindi na umabot ng buhay sa Metropolitan Medical Center ang biktimang si Jessie Retagle, alyas “Bunso”, binata, ng Claro M. Recto Ave., Sta. Cruz, Maynila.
Nakatakas naman ang suspek na kinilalang si Benigno Lamberte, 23, ng Estero de Magdalena, Sta. Cruz, Maynila.
Sa ulat ni Det. Benito Cabatbat ng Manila Police District-Homicide Section, naganap ang insidente dakong alas- 12:20 ng madaling araw, sa Estero De Magdalena, malapit sa bahay ng suspek.
Nabatid na nag-iinuman ang biktima at suspek hanggang sa magtalo hinggil sa selos ng suspek sa una dahil pinakikialaman umano nito ang live-in partner ng huli na isang alyas “Jean”.
Dahil sa pagtatalo ay iniwan na lamang ng biktima ang suspek na lingid sa kanyang kaalaman at sinundan siya at sunud-sunod na inundayan ng saksak sa likuran.
Duguang humandusay ang biktima sanhi ng maraming saksak sa katawan habang mabilis namang tumakas ang suspect. (Ludy Bermudo)