Tinawag muna ng sir, saka minura bago inundayan ng saksak ng isang naburyong na binata ang isang unipormadong pulis, kahapon ng madaling-araw sa Navotas.
Nagawa namang masalag ng biktimang si PO2 Noel Falcatin ng Northern Police District-Dictrict Mobile Force ang pananaksak ng suspect na si Wilmer Viverino, 22 ng Los Martirez St., San Jose ng nabanggit na lungsod.
Batay sa ulat, dakong alas-4:30 ng madaling-araw nang mangyari ang insidente habang naglalakad si Falcatin sa Los Martirez St., nang salubungin ng suspect sabay mura at sabihan ng “Sir bakit ngayon ka lang”.
Laking-gulat na lamang ng biktima nang biglang bumunot ng patalim ang suspect at undayan siya nito ng saksak na nagawa naman niyang masalag.
Ilang minuto pa umanong nagpambuno ang biktima at ang suspect hanggang sa magapi ng una ang huli at dinala sa presinto saka sinampahan ng mga kaukulang kaso.
Inaalam pa kung ano ang motibo ng tangkang pananaksak ng suspect sa biktima. (Rose Tamayo-Tesoro)