Sa halip na pasasalamat, saksak sa katawan ang natamo ng isang 45-anyos na lalaki nang pagsabihan nito ang kapitbahay na pinayagan niyang makigamit ng banyo at hindi magbuhos matapos dumumi, sa Tondo, Maynila kamakalawa ng gabi.
Bumagsak sa Gat Andres Bonifacio Hospital ang biktimang si Rolando Castro, ng Panday Pira St., Velasquez, Tondo matapos magtamo ng saksak ng ice pick sa dibdib.
Hinahanting na ng pulisya ang suspect na kinilala lamang sa alyas na Dabu, pedicab driver at kapitbahay ng biktima na tumakas matapos ang pananaksak.
Ayon sa ulat, dakong alas-9 ng gabi nang maganap ang insidente sa harapan ng bahay ng biktima.
Bago ang insidente, nakita ng biktima ang suspect na namimilipit na sa sakit ng tiyan at hindi na aabot sa kanilang bahay kaya pinayagan niya umanong makigamit ng kanyang kubeta.
Nang papalabas na ang suspect sa banyo ng biktima, mabilis inalam ng huli kung nagbuhos sa ini doro at nang matuklasan na hindi ay sinita ito ng biktima. Sa halip na humingi ng pasensiya, nairita ang suspect na nauwi sa pagtatalo at humugot ang huli ng ice pick at inundayan sa dibdib ang biktima. (Ludy Bermudo)