Nahaharap sa kasong rape ang isang 67-anyos na Hapones na nanghalay umano sa kanyang 15-anyos na katulong sa Ermita, Maynila, sa ulat kahapon.
Ang suspect na si Nakamuro Daijo, pansamantalang nanunuluyan sa #456 Salas St., Ermita ay napiit matapos ipaaresto ng biktimang itinago sa pangalang “Sheena May”.
Naganap ang insidente noong gabi ng Agosto 21 sa bahay ng suspek. Sa presinto, walang maisagot ang suspek kungdi ‘cannot be’ nang tanungin siya hinggil sa alegasyon ng biktima.
Gayunman, umayon sa suspek ang naging resulta ng medico legal mula sa Philippine General Hospital na nagsasabing ‘negative’ sa penetration ang ari ng biktima o walang naganap na panghahalay sa kabila ng akusasyong naisakatuparan umano nito.
Tiniyak naman ni Chief Insp. Nits Araullo, hepe ng Women and Children’s Desk ng Manila Police District na itutuloy pa rin nila sa piskalya ang pagsasampa ng kaso dahil, alinsunod sa batas, ikinukonsiderang rape ang simpleng pagdampi o pagdutdot lamang ng suspek sa maselang bahagi ng biktimang menor-de-edad. (Ludy Bermudo)