Agad na nasawi ang isang 46-anyos na biyuda matapos na mahagip at magulungan ng trailer truck kahapon ng madaling-araw sa lungsod Caloocan.
Nakilala ang nasawi na si Mercedita Vito ng Staging Area, Camia St., Malaria, Tala ng nabanggit na lungsod.
Kasalukuyan namang nakapiit habang inihahanda ang kaukulang kasong isasampa laban sa driver na si Armando Quileb, 53, ng Moncada, Tarlac City.
Sa ulat ng pulisya, dakong alas-5 ng madaling-araw nang maganap ang insidente sa panulukan ng Quirino Highway at Malaria Road, Malaria ng nasabing lungsod.
Nabatid na kasalukuyang tumatawid ang biktima sa naturang lugar nang aksidenteng mahagip ito ng trailer truck na minamaneho ng suspek. Duguan itong bumagsak sa kalsada.
Matapos nito ay pumailalim pa ang katawan ng biktima na naipit sa hulihang gulong ng tractor na naging dahilan ng daglian nitong kamatayan habang ang driver ay kusa namang sumuko sa tanggapan ng Caloocan City Traffic Enforcement Unit (CCTEU) North Sector. (Lordeth Bonilla)