Sa report na ipinadala sa tanggapan ni PNP Chief Oscar Calderon, ang suspect ay nakilalang si Hirofumi Ando, 52, na may business address sa Mie Pres. Inabe, Gun Touincyo Shiroyama, 1-37-1 Japan. Ayon sa PNP-Aviation Support Group, ang suspect ay paalis na sana ng bansa at pasakay sa Philippine Airlines Flight PR-438 papuntang Nagoya, Japan nang masabat ng mga awtoridad ganap na alas-12:31 ng gabi kamakalawa.
Ayon kay PNP-Spokesman Senior Supt. Samuel Pagdilao Jr., agad nadiskubre ng mga elemento ng Police Center Aviation for Security-Aviation Security Group (PCAS-ASG) sa screening checkpoint North Wing NAIA-CT2 ang matataas na kalibre ng armas ng suspect na nakasilid sa itim na trolley bag kaya’t nang isagawa ang manual check dito, ang mga kabilang sa nasabat ay ang 1-revolving cylinder, 1-hard gun slide plate, 1-cylinder rod long, 1-extractor rod na may ejector star, 1- wooden hand-gun grip, isang 38 cal. revolver gun replica, 1-hand plastic knife, 1-cylinder rod short, 1-revolver gun type, 1-metal coil spring, 1-metal spring, 7 piraso ng hand-gun crews at 8 piraso ng iba’t ibang klase ng metal gun parts.
Agad itong sinampahan ng kasong paglabag sa PD 1866 o Illegal Possession of Firearms and Ammunitions sa Pasay Prosecutor’s office at P60,000 ang piyansang inirekomenda dito. (Angie dela Cruz)