Kinilala ni Senior Inspector Samuel Turla, commander ng Police Community Precint 6 ang suspect na si Jefferson, nakatira sa Brgy. Nangka, Marikina City.
Ayon sa pulisya, papasakay na ng MRT sa Rotonda sa may EDSA ang bata kasama ang isang alyas Jojo dakong alas-3:45 ng hapon nang mapansin ng guwardiya na si Felix Aquino dahil sa kahina-hinalang kilos ng mga ito.
Sinita ng guwardiya ang dalawa at nang kapkapan ni Aquino ang bata ay napansin na may matigas na bagay sa kaliwang binti nito.
Itinaas ng guwardiya ang pantalon ng bata at nagulat na lamang ang guwardiya nang makita na naka-plaster sa hita nito ang isang plastic na naglalaman ng may 1/4 kilo ng shabu.
Mabilis na tumakbo pababa ng MRT ang kasama ng bata na si Jojo at naiwan sa kustodya ng guwardiya si Jefferson.
Nang dalhin sa himpilan ng pulisya ang bata, sinabi nito na hindi sa kanya ang shabu at inilagay lamang sa kanyang hita ng kasama niyang si Jojo.
Nabatid na nakatakda nilang dalhin ang epektos sa Cubao.
Nakatakdang dalhin si Jefferson sa pangangalaga ng Department of Social Welfare and Development (DSWD) dahil sa pagiging menor-de-edad nito.
Pinaghahanap naman ng pulisya ang kasamahan nitong si Jojo. (Ulat ni Lordeth Bonilla)