Kon dili mokakak
Kon pakuratan ni Davao City Mayor Baste Duterte ang publiko ug imbes sa naandan nga kakak motuman siya sa supina sa Senate impeachment court ug motambong sa husay sa sunod semana, kinahanglang karon pa lang mangandam na sa pagtubag sa mosunod nga mga pangutana:
Nahibawo ba si Baste nga gideklarar ni Bise Presidente Sara Duterte sa iyang statements of assets, liabilities and net worth (SALNs) ang pagpanag-iya sa Gencorp Industries Inc. uban ang 2013 isip date of acquisition?
Kanus-a man si Baste unang nahibawo nga nalista ang Gencorp sa SALNs ni VP Sara?
Wala ba motug-an si VP Sara ngadto ni Baste sa iyang pagpanag-iya sa Gencorp?
-o0o-
Mas gamay ang kahigayonan nga mangahas pagtambong si VP Sara sa iyang impeachment trial kay mas lisod ang nagpaabot nga mga pangutana sa prosecutors ug senator judges:
Tinuod ba nga nagpabilin siyang sakop sa board of directors ug sa management committees sa Metro City Chow Foods bisan napili nang bise presidente niadtong 2022?
Unsa may tinuod niyang kapasidad sa Gencorp Industries Inc.?
Nganong gilista man niya ang Gencorp sa iyang SALNs pero wala maapil ang iyang ngalan sa articles of incorporation ug general information sheet sa kompaniya nga gisumiter ngadto sa Securities and Exchange Commission (SEC)?
-o0o-
Kon molingkod na sa witness stand dili makabuot si VP Sara nga kutob ra sa Gencorp ug Metro City Chow ang mga pangutana. Kinahanglan nga tun-an sab niya ang pagtubag nga walay sagol nga pamalikas ang mosunod nga mga pakisusi:
Nganong niabot man og P98.6 milyones ang iyang net worth sa 2025 nga wala may klarong kita ang iyang mga kompaniya ug ang kinatibuk-an niyang suweldo sukad sa 2007 (nga dili ibanan sa bisan unsang gasto) mokabat ra man og P30 milyones?
Nganong human nideklarar og minilyon ka pesos nga cash on hand ug in bank sa nangaging SALNs, nilista na man nga zero ang iyang cash on hand ug in bank sugod sa 2019 hangtod sa 2025?
Nganong wala man ideklarar sa iyang SALNs ang P6.77 bilyones nga mga transaksiyon ug P4.4 bilyones nga mga deposito sa bank accounts niya ug sa iyang bana?
- Latest
