Angay lang paninglon
Sa dili pa motiyabaw si Bise Presidente Sara Duterte nga politikanhong pagpanggukod ang ilang nahiagoman, angay niyang ilhon nga–lahi sa gipasangil nga pagpapatay, pagpapriso ug pagbinastos sa ilang pamilya sa ilang mga kaatbang sa nangaging katuigan–dunay abundang mga sukaranan ang nagpadayon nga mga pagpaningil batok nila:
Mahimong naka-benepisyo ang administrasyon ni Presidente Ferdinand Marcos Jr. sa pagkapriso ni kanhi Presidente Rodrigo Duterte sa The Hague (kay naibanan ang mga nagsige og awhag sa mga sundawo ug mga polis sa pagbakwi sa ilang suporta sa commander in chief), pero angay siyang patubagon sa kapin sa 35,000 ka laktod nga pinatyanay sa binuang niyang drug war;
-o0o-
Mahimong makabentaha ang administrasyon sa 2028 kon makonbikto si VP Sara sa impeachment trial (nga mo-disqualify niya sa pagka presidente), pero angay siyang patubagon sa mga pasangil sa pagbolsa sa confidential funds ug pagtago og binilyon ka pesos nga ilegal nga katigayonan;
Nasakmit sa mga alyado sa administrasyon ang liderato sa Senado tungod sa mga kaso sa pipila ka senador, pero angayng paatubangon si Senador Bato dela Rosa sa kasong crimes against humanity sa International Criminal Court ug angayng prisuhon silang Senador Jinggoy Estrada ug Senador Rodante Marcoleta kay dili kapiyansahan ang ilang mga kasong plunder;
-o0o-
Mahimong mosamot paghiyos ang mga alyado ni VP Sara sa Senado kon madayon ang mga kasong plunder batok nilang Senador Alan Peter Cayetano ug Senador Loren Legarda, pero kinahanglang patubagon si Cayetano sa pasangil sa mga anomaliya sa binilyon ka pesos nga gasto sa Southeast Asian Games sa 2019 ug sa minilyon ka pesos nga mga proyekto sa Taguig City ug paatubangon si Legarda ug iyang anak sa pasangil sa pagpa-ginansiya, hinikalimtan ang pagserbisyo sa publiko, sa prangkisa ug balor og binilyon ka pesos nga mga kontrata sa solar power; ug
Mahimong maapektohan ang lehitimong kampanya batok sa flood control scandal, apil nang kaso batok ni kanhi House Speaker Martin Romualdez, pero angayng susihon ang pangangkon sa pipila sa 18 ka kanhi-marines nga gipugos sila pagpirma og affidavit ug pag-apil sa kampanya sa pagkuha sa simpatiya sa kasundalohan aron mapalagpot si Marcos Jr. ug makapuli dayon si VP Sara sa Malakanyang.
- Latest
