Solo parent gitinguhang mahatagan og ayuda

CEBU, Philippines — Nakadawat og lapad nga suporta ang ordinansa nga gipangamahanan ni Konsehal Harry Eran nga maghatag og binuwan nga P1,000 nga tabang pinansiyal alang sa kwalipikadong solo parent sa Dakbayan sa Sugbo apan gisugyot sa konseho nga pahugtan ang mga kwalipikasyon sa mga benepisyaryo aron nga malikayan ang posibleng pag-abuso sa programa.

Tumong ni Eran ang mahatagan og regular nga tabang pinansiyal ang mga kwalipikadong solo parent ubos sa Department of Social Welfare and Services (DSWS).

Atol sa public hearing, gipahibalo ni Portia Basmayor, pangulo sa DSWS nga adunay 3,212 ka rehistradong solo parent applicants sa siyudad apan 1,862 lang ang nakapasar sa assessment ug mahimong makadawat sa gisugyot nga ayuda base sa ilang kita ug uban pa’ng kwalipikasyon.

Matud ni Basmayor nga ang programa gidumala karon sa Family Welfare Program sa DSWS ug makadaghang higayon nga nangayo ang departamento og pundo nga P20 milyones apan wala kini naaprobahan sukad pa niadtong 2024.

Bisan og nangayo ang departamento og samang kantidad niadtong 2025 apan P1 milyon lang ang gibutang sa budget account.

 Alang sa 2026, giduso pagbalik ang P20 milyones nga budget proposal alang sa P1,000 nga binuwan nga ayuda apan wala gihapon kini maaprobahi.

Bisan og kanunay nga dili maaprobahan ang budget proposal naglaom gihapon ang DSWS sa P20 milyones alang sa tuig 2027.

Gikuwenta ni Konsehal Francis Esparis nga mokabat sa P22.34 milyones matag tuig ang gikinahanglan aron mahatagan og P1,000 matag buwan ang 1,862 ka kwalipikadong benepisyaryo diin matud sa konsehal nga kuwang ang kantidad sa budget proposal sa DSWS.

Gipasabot ni Basmayor nga bisan adunay Solo Parent Identification Card ang tanang rehistradong aplikante dili tanan mahimong makadawat sa ayuda.  Ang kwalipikado mao ang adunay binuwan nga kita nga P11,528 o ubos pa nga base sa minimum wage sa siyudad.

Gawas sa income requirement, giila sab sa DSWS nga kinahanglan nga residente kini sa siyudad, adunay voter’s registration, nakapasar sa age requirement ug validation sa social workers.

Ang mga aplikante nga nagpuyo na usab uban sa bag-ong pares o nakadawat og igo nga suporta gikan sa partner mahimong tangtangon sa lista. (BANAT NEWS)