Kapin 100 kilong shabu gisunog

CEBU, Philippines — Kapin P676.6 milyones nga kantidad sa shabu, marijuana ug uban pang regulated drugs ug expired nga regulated nga medisina ang gipangsunog sa mga sakop sa  Philippine Drug Enforcement Agency (PDEA)-7 niadtong Martes, Hulyo 28, sa Cosmopolitan Funeral Homes sa Junquera Street, Barangay Kalubihan, Syudad sa Sugbo.

Gihimo kini uban sa Police Regional Office-Central Visayas (PRO-7) ug sa Cebu City Government ug kini maoy gikonsiderar nga pinakadako nga drug destruction nga nahitabo sa Central Visayas.

Gisunog sa mga otoridad ang 99.45 ka kilong shabu, 2.54 ka kilo sa marijuana, walo ka mililitro sa nalbuphine hydrochloride, 18 gramos sa ephedrine, uban pang delikadong droga ug expired regulated medicines nga adunay kinatibuk-ang kantidad nga P676,659,213.84.

Ang tanang gisunog nga kontrabando mga ebidensiya ni sa mga nangaging mga anti-illegal drugs operations sa tanang law enforcement units sa tibuok Central Visayas sa nakalabay nga mga bulan.

Ang mga kaso ani duna nay pinal nga hukom sa korte ug gimando na nga idispatsar aron dili na ma-recycle pa ug mabaligya.

Ang maong mga illegal nga drugas nga gipangsunog kagahapon mas daghan ni kun ikumparar sa gipangsunog niadtong Disyembre 17, 2025, nga mokabat lang og 68.819 ka kilong shabu, 866 gramos nga marijuana, ug uban pang delikadong droga nga nagkantidad og P468.08 milyones.

Sumala sa PDEA-7, nagpadayon ang pagsaka sa gidaghanon ug kantidad sa mga nakompiskang droga nga gisunog sa rehiyon sukad sa unang destruction activity niadtong Hulyo 26, 2017, diin 2.5 ka kilo sa shabu ug uban pang delikadong droga nga nagkantidad og P10.06 milyones ang gisunog.

Lakip sa dagkong destruction activities kaniadto ang gihimo niadtong Hunyo 5, 2025, nga adunay 82.34 ka kilo sa shabu ug uban pang droga nga nagkantidad og P560.4 milyones, ug niadtong Nobyembre 14, 2024, diin gisunog ang 71.83 ka kilo sa shabu ug uban pa nga nagkantidad og P489.4 milyones.

Matud  sa PDEA, nagpakita lang kini nga walay hunong ang gobiyerno sa kampanya batok sa  ilegal nga drugas, apil ang pagsigurong dili na kini mabalik pa sa kadalanan.

Samtang gipahigayon ang destruction activity, gipanghatag usab sa PDEA ang cash incentives ngadto sa mga civilian informants ubos sa Operation: Private Eye, agi og pag-ila sa ilang dakong papel sa malampusong pagkadakop sa mga drug personalities ug pagkakompiska sa dagkong kantidad sa ilegal nga droga sa Central Visayas.                                                 

Recycle

Sa miaging semana, giawhag ni Cebu City Mayor Nestor Archival ang PDEA nga papaspasan ang pagguba o pagsunog sa mga nakumpiskar nga mga ilegal aron malikayan ang mga pagduda sa publiko nga gi-recycle o gibaligya kini og pagbalik.

“Akong gipanghingusgan. Ang akong nakuyawan man gud naa man gu’y mga isturya nga kaning mga nadakpan, ma-recycle,” matud ni Archival.

Misunod ang panawagan ni Archival human sa iyang partisipasyon sa Cebu City sa Regional Coordination Meeting on the Philippine Anti-Illegal Drugs Strategy (PADS) niadtong Hulyo 20 kun diin gihisgutan ang pagpalig-on sa mga programa batok sa ilegal nga droga ug ang epektibong estratihiya aron nga mapakgang ang ginadiling buhat.

Si Archival mismo mibarog isip ehemplo pinaagi sa kalit nga pagpa-drug test sa City Hall uban sa kapin 100 ka empleyado sa Office of the Mayor ug City Hospitalization Assistance and Medicines Program (CHAMP)  isip kabahin sa Drug-Free Workplace Program sa siyudad. Gikalipay sa mayor nga nagnegatibo ang resulta sa iyang drug test.

Sacleo

Sa pikas bahin, kapin P937,000 nga kantidad sa gituohang shabu ang narekober sa Cebu Police Provincial Office (CPPO) atol sa ilang mga operasyon batok sa ilegal nga droga sa nagkadaiyang lungsod sa lalawigan sa Sugbo gikan Hulyo 20 hangtod 26.

Nadakpan sad ang 30 ka wanted persons, lima  tungod sa illegal nga armas  ug eksplosibo.Tulo ka armas ang boluntaryong gitugyan ubos sa Oplan Katok.

Nadakpan usab ang 32 ka tawo  tungod sa sa ilegal nga sugal,  2,905 ka mga violators ang gipamulta tungod sa mga paglapas sa lokal nga mga ordinansa nga niresulta pud sa  P1.126 milyon nga nakolektang multa sa maong kampanya.

Sa laing operasyon kontra illegal nga drugs, nadakpan ang usa ka 41-anyos nga lalaki human makuhaan og 15.99 gramos sa gituohang shabu nga adunay Standard Drug Price (SDP) nga P108,732 ug usa ka .38 caliber revolver nga adunay lima ka buok nga bala atol sa pagpatuman sa search warrant sa Sitio Himongbungan, Barangay Cantuod, Balamban, Cebu sa sayong buntag sa Martes, Hulyo 28, 2026.

Ang nadakpan giila nga si alyas Reygo, pinasikad sa search warrant nga gipirmahan niadtong Hulyo 24, 2026 ni Executive Presiding Judge Judilyn H. Tapia-Menchavez sa Regional Trial Court Branch 7 sa Toledo City tungod sa illegal nga drugas.

Apan wala siyay napakitang legal nga papel sa pagtinil og armas maong giapil kini sa iyang kaso.—  Shiela Mae Agrabio Preciosa L. Bacalso ug Caecent Magsumbol, IBM BANAT NEWS