Lima ka city hall bus drivers hayan makasohan

CEBU, Philippines — Lima ka bus drivers ug usa ka electrician sa kagamhanan sa Dakbayan sa Sugbo ang posibleng mag-atubang og administratibong kaso human nasayran nga nagbutang og dili awtorisadong reverse alarms sa mga bus nga iya sa kagamhanan.

Base sa report sa Department of General Services (DGS), wala kini awtorisasyon nga magbutang og reverse alarms sa mga bus mao nga mirekomendar kini sa pagpasaka og administratibong kaso tungod kay nakalapas sila sa mga lagda sa pag-usab sa mga sakyanan sa gobyerno nga walay pagtugot.

Subay sa imbestigasyon sa DGS, ang mga drayber miesplikar nga nagbutang kini og reverse alarms aron mapalambo ang kaluwasan sa operasyon sa mga bus tungod kay lisud nila pagtan-aw sa likod samtang gaatras ug sa mga blind spots nga mahimong hinungdan sa aksidente. Upat sa mga drayber migamit og standard reverse warning devices nga gikuha gikan sa mga city bus nga wala na magamit. Kining mga aparato nagpagawas sa kasagarang “beep-beep” nga tingog nga sagad gamiton sa komersyal ug mga sakyanan sa gobyerno.

Apan usa sa mga drayber personal nga mipalit ug nagbutang og dili standard nga reverse alarm nga nagpagawas og dili angay nga sound effects.

 Mao usab kini nga bus nga nakuhaan og video ug nag-viral sa social media nga milabay duol sa usa ka lubong hinungdan nga gisaway kini sa publiko.

Anaa sab sa imbestigasyon nga ang maong drayber gipahimangnuan nang daan sa mga kaubang  drayber nga tangtangon ug ilisan ang maong alarm apan wala kini maminaw.

Nasuta usab sa DGS nga ang city electrician maoy nag-instalar sa mga reverse alarms tungod sa hangyo sa mga drayber bisan wala niya masiguro kung aduna ba kini gikinahanglang pagtugot gikan sa mga opisyal sa departamento.

Tungod niini, mirekomenda ang DGS nga ang Human Resource & Development Office (HRDO) ug City Legal Office ang mopahigayon og ebalwasyon sa mga sad-an nga mga empleyado ug mao na sab kini ang mohukom sa posibleng pagpasaka og administratibong kaso ubos sa Revised Rules on Administrative Cases in the Civil Service.

 Kinahanglan sab nga ipaubos og inspeksyon ang tanang dili awtorisadong reverse alarm sa mga city-owned bus ug ang pag-ilis niini sa mga aprubadong standard warning devices kon gikinahanglan.

Sa pagpagkighinabi ngadto kang Mayor Nestor Archival, gikumpirma niini nga natangtang na ang mga reverse alarms pero ang mga gibuhat sa mga nalambigit dili angayan nga palabyon tungod kay seryoso ang siyudad nga modisiplina sa mga buluyugaon nga mga empleyado aron mapugngan ang mga mosupak sa mga lagda sa gobyerno.   IBM BANAT NEWS