Bugno sa impiyerno

Hagbong sa iyang unang pagsuway ang liderato ni Acting Senate President Sherwin Gatchalian. Kadudahan ang pangangkon sa iyang grupo nga sila nay mga pangulo sa Senado tungod sa kapakyas pagbadlong sa public hearing nilang Alan Peter Cayetano ug kaubanan.

Pila ka minuto human gipahibawo ni Gatchalian sa media ang iyang sugo nga dili pasudlon ang resource persons nga gi-imbitar sa kanhi liderato sa Senate Blue Ribbon Committee, nakasulod ug naka-testify ang 18 ka nagpailang kanhi marines. Maglisod ang publiko pagsalig sa usa ka lider nga dili kapatuman sa iyang sugo.

-o0o-

Dili ko moawhag sa grupo ni Gatchalian sa paggamit og puwersa. Bisan adjourned na ang sesyon, dili sila makapugong sa Cayetano bloc ug sa ilang staff sa pagsulod sa ilang mga upisina.

Pero kon tugotan silang makapadayon paghimo og public hearings sa ngalan sa mga komitiba nga duna nay bag-ong mga tagdumala, bisan unsa ka dili katuohan ang ilang mga testimoniya, maglibog ang publiko. Duha na ba ang Senado? Walay nakabadlong nilang Cayetano sa pag-boykot sa sesyon, makapatuyang ba lang gihapon paghimo og bisan unsa karong wala nay sesyon?

-o0o-

Abunda og sukaranan (Avelino v. Cuenco sa 1949 ug mas bag-ong mga desisyon sa Korte Suprema ug nangaging mga sesyon sa Senado) silang Gatchalian ug kaubanan sa pangangkon nga duna silay quorum niadtong Miyerkules sa paghimo sa sesyon, pagdeklarar nga bakante sa tanang puwesto sa Senado ug pagpili ug bag-ong mga opisyal.

Pero nihit og ebidensiya ang ilang kaandam pagpanalipod sa kaligdong sa Senado. Gikan sa mga puwersa nga, human ni-inutil sa institusyon, nihimo niini nga plataporma sa padayong pagbugal-bugal sa mga balaod.

-o0o-

Dili angayng mokumpiyansa ang bag-ong liderato sa Senado sa Cayetano bloc. Imbes mamakasayon ug magsaulog sa ilang kadaogan, angayng pangandaman ang umaabot pang mga kaguliyang nga ilang mahunahunaan.

Gitagoan ug gipaikyas nila si Bato dela Rosa, nag-imbento sila og atake sa Senate building, nisuway pagbabag sa pagdakop sa ilang kauban nga sinumbong sa plunder, ni-boykot sa sesyon nga silay nagpatawag ug karon nikabayo sa Senado nga morang ilang pribadong entablado. Huwaton pa ba nato nga tinud-on ni Cayetano ang paborito niyang mga hulga sa sunog ug bugno sa impiyerno?