Cheetahs, Baby Lancers 2-0 na sa CESAFI basketball

CEBU, Philippines — Ang Benedicto College Cheetahs ug University of the Visayas (UV) Baby Lancers mipayaka sa tagsa-tagsa nila ka mga karibal aron pagpabiling way pilde human sa duha ka duwa sa Cebu Schools Athletic Foundation, Inc. (CESAFI) Season 24 basketball tournament niadtong Martes sa gabii, Oktubre 1, didto sa Cebu Coliseum.

Si Albert Joshua Tolipas mipupo og 16 puntos, lima ka rebounds, upat ka assists ug tulo ka steals sa dihang ang  Cheetahs nakasugakod sa mainit nga resbak sa University of San Carlos (USC) sa second half aron tumbahon ang Warriors, 73-66.

Midugang si Jesli De la Cruz og 12 puntos, siyam ka rebounds ug tulo ka assists, si Kenneth Babalcon mi-iskor og 11 uban ang upat ka rebounds, tulo ka assists ug tulo ka steals, samtang si Rogelio Tolipas Jr. miamot og 10 puntos alang sa Cheetahs nga diriyot mikolapso human miposte og 16 puntos nga labaw, 49-33, sa sayong bahin sa ikatulong kuwarter.

Ang Warriors nakasikit ngadto na lang sa tres puntos, 58-61, sa pinal nga singko minutos apan ang Cheetahs kalmadong miduwa taliwala sa presyur aron pagipsot ngadto sa siyete puntos nga kadaogan. Si James Paolo Gica mikadlit og 18 puntos, pito ka rebounds, tulo ka assists, duha ka steals ug usa ka block samtang si Bryle Andrei Puntual mihipos og 10 puntos ug tulo ka rebounds apan way nahimo gumikan kay ang Warriors misukarap ngadto sa ikatulo nilang sagunson nga pilde.

Sa high school division, si Roderick Cambarijan Jr. mipupo og double-double nga 28 puntos ug 10 ka rebounds nga iyang gipalamanan og tulo ka assists, lima ka steals ug duha ka blocks aron pangulohan ang Baby Lancers ngadto sa 99-85 nga pagpatikangkang sa kanhi way pildeng Cebu Eastern College (CEC) Dragons.

Si John Nathan de la Torre midonar og 15 puntos, lima ka rebounds, unom ka assists ug upat ka steals samtang sila si Jhunrel Dagatan ug Kent Clark Castro nagkumbinar og 26 puntos alang sa Baby Lancers, nga mi-abante og 17 puntos, 53-36, sa halftime.

Ang Dragons igo lamang nakapaduol ngadto sa otso puntos, 49-57, gumikan kay ang Baby Lancers dali nga naka-establisar og balik sa double-digit nilang bentaha, 74-62, human sa tulo ka kuwarter.

Si Lybron James Lamo maoy nangu sa CEC uban ang 23 puntos, unom ka rebounds, ug duha ka assists. Sila si Mark Justine Parilla, Kenneth Robert Fuller Jr. ug Reyvene Arobo nagkumboya'g 35 puntos apan nahug sa wala ang ilang paningkamot gumikan kay naputol ang tulo ka sunod-sunod nga daog sa Dragons.