Jaguars mibuntog sa Warriors alang sa unang daog sa CESAFI

CEBU, Philippines — Ang University of San Jose-Recoletos (USJ-R) Jaguars madasigong namawi gikan sa mabugnaw nga sinugdanan aron pakagingon ang University of San Carlos (USC) Warriors, 73-69, alang sa una nilang daog sa Cebu Schools Athletic Foundation, Inc. (CESAFI) Season 24 basketball tournament niadtong weekend diha sa Cebu Coliseum.

Alkansi og siyete puntos, 20-27, sa sayong bahin sa ikaduhang kuwarter, ang Jaguars miresbak pinaagi sa nagbagang 15-6 rally aron ilogon ang labaw, 35-33, sa halftime.

Sukad niini, sikit na kaayo nga nahitabong kumbati tali sa duha ka kampo apan ang Jaguars mipakita og igong katakos taliwala sa presyur sa naghinapos nga bahin sa kulbahinam nga aksiyon sa pag-ipsot ngadto sa kuwatro puntos nga kadaogan batok sa Warriors.

Si Elmer Echavez ang bida sa Jaguars bitbit ang 19 puntos, upat ka rebounds, usa ka assist ug tulo ka steals.

Mihimo sab og kasikas si Al James Calizar uban ang 13 puntos ug pito ka rebounds alang sa Jaguars.

Si Kyle Maglinte miposte og double-double nga 13 puntos ug 12 ka rebounds aron pangulohan ang Warriors.

Si James Gica mitapos sab uban ang 13 puntos, lima ka rebounds, upat ka assists ug upat sab ka steals samtang sila si Rey Enriquez ug Bryle Puntual nagkumbinar og 21 puntos, walo ka rebounds, ug tulo ka steals apan nangahoyhoy ang ilang abaga kay ang Warriors nasugamak sa ikaduha nilang sagunson nga pilde.