Tropang Giga miabante sa PBA semis
CEBU, Philippines — Ang TNT Tropang Giga mikastigo na sab sa NLEX Road Warriors, 125-96, sa Game 4 aron pag-angkon og luna sa PBA Governors' Cup semifinals niadtong Martes sa gabii, Oktubre 1, didto sa Ninoy Aquino Stadium sa kaulohan.
Gipangulohan sa import nilang si Rondae Hollis-Jefferson, gihuman sa Tropang Giga ang ilang best-of-five quarterfinal series batok sa NLEX sa baraha nga 3-1. Si Hollis-Jefferson mibomba og 35 puntos uban ang 11 ka rebounds.
Lain pang lima ka players ang misidlak sa kampo sa TNT, nga wala na molingi pa sukad miposte og 21 puntos nga labaw sa sayong bahin sa ikaduhang kuwarter.
Sila si Rey Nambatac ug RR Pogoy nagkumboya'g 37 puntos samtang sila si Calvin Oftana ug Glenn Khobuntin mitali og 11 puntos matag usa alang sa Tropang Giga.
"In basketball, it's about playing defense and putting the ball in the hoops. In the quarterfinals, we finally hit some shots," matud pa ni TNT coach Chot Reyes.
Kay sayong gitagak ang Road Warriors, ang TNT makapahimus og taas nga pahuway sa dili pa sangkaon ang modaog sa serye tali sa Rain or Shine Elasto Painters ug Magnolia Hotshots unya sa Final Four.
- Latest
