Palahubog ang gf

Dear Ttito Miguel,

Ako diay si  Joshkim, taga  Barangay  Tisa, Cebu City . Akong uyab ba nga si Jenine, makalagot kaayo , kay kusog kaayo motagay. Wala rako’y problema anang inom, apan  matawag naman siya nga palahubog uy. Dili baya ko mo-pugong sa iyang mga laag, apan kadaghan na nahitabo nga ako siyang giapas sa iyang gilaagan , kay nagpatabang ang iyang barkada aron mahatod kini sa pagpauli  kay lage hubog na kaayo. Okay raman unta nga usahay lang,apan nakabantay ko nga murag taga weekend naman uy. Usahay ako siya ubanan daan sa tagay, apan dili baya sa tanang panahon nga magkauban mi sa weekend kay usahay maglarga-larga ko og laing lugar tungod sa akong work. Unsa ang  angayan nakong buhaton sa palahubog nako nga uyab? — Joshkim

* * *

Joshkim,

Kinahanglan imo tugkaron ngano ganahan siya moinom. Kun alcoholic na siya, kinahanglan na niya ang propesyonal nga tabang. Kun tungod sa iyang barkada nga lagmit imo na sad nga mga higala, hangyoa sila nga limitahan ang pag-imbitar sa iyaha. Kun siya ang mangagda, hangyoa sila nga balibaran panagsa. Lagmit sad duna ni siya mga pinahipi nga gibati o ganahan isulti nga kinahanglan imnan aron siya makursunada mo-istorya.  Basin duna ni siya mga pagmahay o kahiubos nimo o sa iyang pamilya. Istoryaha, basin duna siya'y isulti nga wa pa nimo madunggan. Pero kun ganahan lang gyud siya moinom, lisod ni wagtangon. Dili malalis o mapugngan ang gusto sa tawo.   Pero mahimong limitahan.

Suwayi nga imong saboton nga diha ra siya maka inom kun naa  ka aron dili siya makahasol sa iyang mga higala kun mag maoy na siya. Pero lagmit moipsot gihapon kay mao lagi iyang ganahan. Suwayi nga inig ka hubog niya imo videohan sa tago, ipakita kun mahuwasan na aron siya mismo makaamgo unsa siya ka katag kun magmaoy. Lagmit mauwaw ug dili na mousab. Posible sad dili gihapon mausab. Mahimo sab nimo agnihon nga inay ang kuwarta iyang igasto sa inom, inyo kini tigomon alang sa inyong kaugmaon. Kun dili mosugot, lagmit wala siya'y plano para sa inyong relasyon. Kun duna man, dili siya maayo nga kapikas. Basin imong kasingkasing pa ang mapikas.

Magpatambag ka? Ipada kang Tito Miguel: 0991-318-9366