Ang hugot nga gakos ni Busoy ungo

Wala pa mosubang ang buwan karong gabhiona ug maingon nga ngitngit ang kalikopan dinhi sa sityo Habwa-Tungol. Ug matag abot sa kagabhion bation dayon ang kakulba ug kahadlok sa taga dinhi sa sityo tungod kay molanog man dayon ang tingog sa wakwak.

Daghang nagduda nga si Busoy mao ang wakwak apan si Amanda nga anak dalaga nilang Aton-Tanciang nga dunay uma sa may abagahan sa bungtod nga nag-umbaw sa sityo Habwa-Tungol mibadlong sa iyang inahan ug amahan nga dili magpataka’g sulti labi na sa pagduda ug pasangil kang Busoy.

“Kinsa pa may lain, ha, Amanda. Yuna pa, nganong mora’g milaban ka man kang Busoy. Unsa man, may relasyon mo, sige ra ba pagpamisita nimo kada gabii,” ni Manang Tanciang inahan ni Amanda.

“Bitaw, mora’g may relasyon na tingali mo anang Busoy, no, Amanda?” misagbat si Manoy Aton nga diha sa duol kinsa nagdigo sa iyang hiniktan.

Wala motingog si Amanda ug wala na lang pud mopadayon si Tanciang sa pagpakighinabi sa ilang anak. Misulod si Amanda sa kusina aron susihon kun naluto na ba ang gilung-ag niyang kan-on. “Tan-awa, Aton, klaro kaayo nga trato na kana sila ni Busoy,” ni Manang Tanciang ngadtong Aton.

“Mao gyud nay dili nako gustong mahitabo kay kana si Busoy anak ni Litang nga puwerteng mangtasa ug natigbasan kay nangatang ug namugno sa may tulay didto sa sityo Dugdong. Mikulismaot si Nang Tanciang nga nakatuhog sa gipahayag ni Aton. Unya nianang pagka-gabii namisita si Busoy kang Amanda ug ning gabhiona misubang na ang takdol nga bulan ug diha sila manglingkod si Amanda ug Busoy sa ilang pantawan ug sila si Aton ug Tanciang naniid sa mga lihok ni Busoy kinsa naglingkod tupad nga sikit kaayo kang Amanda ug unya ilang nakita nga gigakos ni Busoy si Amanda, hugot nga pagkagakos, ug dayon mingulob si Busoy ug kalit lang milutaw sa hangin ug milupad nga dala si Amanda.

“Hoy, hoy, Busoy, ungo ka gyud diay, ug ayaw tawon dagita ang among anak dalaga, maluoy ka!” singgit ni Aton nga gibati’g kabalaka nga wala makasabot sa iyang nakita ug si Tanciang usab wala makalihok sa iyang gibarogan.

Apan, ilang nabati ang tingog-singgit ni Amanda nga nagkanayon,” Nay, Tay, ayaw lang mo kabalaka kay mobalik ra ko, manuroy lang ming Busoy, hayyy, nindota uyyy!” Ug nabantang ang duha ka anino nga naglutaw sa hangin. (Kataposan)