Isla Paraiso

“Sa imong gibuhat karon, Corpuz,” ni Capt. Sancho Benale pa, “seguradong daghan ang naglungotlungot sa pagpatay kanimo. Ilabi na gayod ang pundok sa mga hold-aper nga maoy naapektohan sa imong gibuhat.”

“Wala ako mahadlok kanila, Sir,” matud ni Rey.

“Nasayod ako niana, Corpuz,” matud ni Capt. Benale. “Apan wala’y maayong laki kun ikaw maunhan.”

“Nakasabot ako sa buot mong ipasabot, Sir. Daghan kaayong salamat sa imong pagpahimangno kanako.”

“Nagkinahanglan ang atong departamento og usa ka maayong laking tinugyanan sa balaud nga sama kanimo. Busa dili ko buot nga mawala ka ning maong departamento. Nakasabot?”

“Yes, Sir.”

“Good!”

Ug nagsaludohay sila. Pagkahuman, migawas na si Rey sa buhatan ni Capt. Sancho Benale.

Samtang naglakaw si Rey paingon sa iyang lawak-buhatan, iyang nasugatan si Col. Martin Villadar diha sa pasilyo. Mug-ot kaayo ang hitsura sa koronel. Wala gani kini motubag sa dihang iya kining gitimbaya.

Sa dihang nagkasayloay na sila, milingi si Rey nga mihunong sa paglakaw. -- Sumpayan pa