Oxygen sa ambulansiya

Unsa toy ipadugang nimo sa agenda ning session nato karong hapona?” sukot ni Vice Mayor Dennis Alim nga maoy presiding officer sa session sa Sangguniang Bayan sa lungsod sa Palatog. Nitan-aw siya ni Manny Hurno, usa sa walo ka konsehal nga nitambong sa session. Nitindog si Manny. “Salamat talahorong chairman sa imong pangutana. Sugyot nako nga maghimo ta’g resolution aron pabutangan og tangke sa oxygen ug kahimanan ang tanang ambulansiya sa atong lungsod” ni Manny.

“Husto. Angay gyud nang butangan tanan. Kay pila man diay ka buok ambulansiya nato?” sa bise mayor. “Tulo. Unya usa ray dunay oxygen” ni Manny. “Nakadungog na ko’g mga pagmahay sa mga tagtungod sa mga pasyente. Daghan kono tang mga pasyente nga nahatud sa mga ospital. Apan dead on arrival” sa bise mayor. “Tinood gyud na, Mr. Chairman. Duha na ka kababata nako nga gihubak o giatake sa kasingkasing. Nadala tood sa ospital. Apan dead on arrival. Hasta sab akong manghod babaye. Giatake adtong niaging semana. Kun wa’ pa ko niinsister nga ambulansiya nga may oxygen ang kargahan, dilikadong ma-dead on arrival sab” ni Manny.“Ok. Quorum man taron. Unsa may ikasulti sa ubang mga konsehales nga nanambong karon?” sa bise mayor. “Aprobahan ta nang resolusyon. Kay pagluwas na sa kinabuhi” ni Konsehal Vic Manto. Niisa sa iyang toong kamot. “Aprob” matud sa laing unom ka mga konsehales. Nangisa sa ilang mga toong kamot.

“Unanimously approved. Maayo sab. Kay basi’g makiha tas mga tagtungod sa mga pasyenteng dead on arrival” sa bise mayor. Dungan sa pagdukdok niya sa kahoy martilyo sa iyang atubangan, ngadto sa dokdokanan nga mora’g torta nga kahoy. “Session adjourned. Kay kini na man lang ang kataposang agenda. Ug Merry Christmas to all. Kay kini na man lang atong katapusang session rong tuiga” dugang sa bise mayor.

“Merry Christmas and a Happy New Year” tubag sa tanang  mga konsehales. Gilamano nila ang chairman ug naglamanohay sab silang tanan. (Kataposan)