Gugma sa Pasko

Mitabang mi si Mama Carol sa among sulugoon sa pag-andam sa among Noche Buena. Nagsugod na paghugpa ang kagabhion. Apan langas ang  palibot sa mga butobuto sa rebentador ug uban pang matang sa  pabuto. Nagsauysaoy ang mga manaygonay. Naghudyaka ang mga tawo sa gawas sa among balay.

Nagsaulog ang kalibotan sa Pasko. Pipila na lang ka oras, moabot na ang pagkatawo sa Batang si Jesus. Unya, nadungog ko nga dihay nanaygon sa among lagwerta. Nagdagan kong mipaingon sa bukas nga bintahan. Nakapahiyom ko, si Noy Greg ang nanaygon.

“Ma! Ma! Naa na sab si Noy Greg. Gidaygonan na sab ta niya!” Mahinangpanon kong miduol sa akong inahan.

“Hala, hulgi siya’g kuwarta.”

Nagdagan kong migawas sa among balay. Gihatagan dayon nako si Noy Greg og kuwarta. Nakaila ko niya kay ako man kanunay ang mohatag niya’g kuwarta sa matag panaygon niya namo. Sugoon ko ni Mama Carol.

“Maayong Pasko, Noy.”

“Maayong Pasko sab nimo, Day Nora.”

Nindot kaayo’g pahiyom si Noy Greg. Ug sama sa kanunay niyang buhaton, hapuhapon niya ang akong ulo. Unya milakaw si Noy Greg.

“Luoy kaayo si Noy Greg. Ma, no? Naglago la’g pamiste. Daot pa gyod. Mora’g way pamilya nga nag-atiman niya.” Matud ko dihang nakasaka na ko’g balik sa among balay.

“Bitaw. Basi’g dako siya’g sala sa iyang pamilya, o sa iyang asawa, maong wa na siya tagda.”

Unya nakahinumdom ko kang Papa Samuel. Maoy sugilon ni Mama Carol nako nga gibiyaan mi ni Papa Samuel kay nakigtaban kini’g laing babaye. Gamay pa ko niadto, wa pay buot. Maayo gani wa magminyo’g laing lalaki si mama. Karon dako na ko, nuybe na ang akong edad.

“Ibog kaayo ko sa akong mga amiga, Ma, uy. Duna sila’y Papa nga kauban sa balay. Unyang tungang gabii, magkuyog silang tibuok pamilya sa pagpanimba.”

Unya nadungog ko na sab ang tingog ni Noy Greg sa among lagwerta.

“Uy, mibalik mag panaygon si Noy Greg, Ma, dinhi sa ato?”

“Dinhi ka lang. Ako’y moadto niya.”

Tungang gabii na. Nagsige na’g bagting ang kampana sa simbahan sa among lungsod sa San Bartolome. Misamot  na kalangas ang palibot. Dugay na ming nagpuyo si Mama sa San Bartolome. Usa siya ka maestra sa  elementaryang pampubliko.

Nakailis na mi si Mama alang sa among pagpanimba. Nakugang ko kay nahiabot si Noy Greg. Dili na siya hugaw og pamiste. Limpiyo na siya. Kaguwapo diay ni Noy Greg, uy, hilom kong nakaingon. Giduol siya ni Mama nga malipayon. “Siya ang imong amahan, Day Nora. Gipasaylo ko na siya. Nakigbuwag siya sa iyang kapuyo kay mopauli na siya dinhi sa ato.”

Naghilak kong migakos kang Noy Greg, aw, Papa Samuel diay. Siya diay si Papa Samuel. Gihapuhap ni Papa Samuel ang akong ulo. Ug malipayon kaayo ko nga nanimba kay kauban ko na man ang akong mama ug akong papa. (Kataposan)

Good day Professor Swami,

Hinaut unta nga maayo ang imong panglawas karon gusto unta ko mahibal-an unsa meaning sa akong alom sa ilong  sa right side ni siya. Naa pud koy alom sa ubos sa mata.  Agianan jud sa luha pero sa gawas nga bahin naa pud koy alom sa liog sa right side

Daghan salamat ug more power.

March