Uyab nga masuko dayon

Dear Tito Miguel,

Ako diay si Jim,  25 anyos, taga Mandaue City. Naa koy uyab nga ginganlan og Carla, ug usa gyud sa akong problema kay dali ra kaayo siya masuko. Gamay nga  butan, dak-on dayon niya. Nangutana ko niya kun duna ba siya’y problema, ug igo  ra siya moingon nga wala daw.

Walay klaro ang hinungdan, magsugod siya og kasuko ug mahimong grabe ang among panaglalis.

Tungod ani, kapoy na kaayo sa akong part ug gikapoy  nako sa  pagsabot niya.

Nakapangutana  ko kung normal ba ni sa usa ka relasyon o kung kinahanglan na ba nako hunahunaon ang akong kaugalingong kaayohan. Dili ko gusto mobiya dayon kay gihigugma nako siya, apan  lisod pud magpadayon kung pirmi nalang ing-ani. Unsay angay nakong buhaton? Unsaon nako pag-handle  ang  iyang batasan?

Daghang salamat, ug padayon sa pagtabang sa mga susama  nako  nga nanginahanglan og giya. - Jim -

* * *

Jim, Basin sapoton lang gyud siya. Duna’y mga tawo nga mubo ra’g pasensiya, moulbo dayon ang kaspa. Wala ka maghisgot kun duna’y mga higayon nga kalma ug sweet siya kanimo. Kun duna, buot pasabot duna siya’y katakos nga magbinut-an. Basin duna lang makapa-trigger sa iyang sapot. Kun mapunting nimo unsa kini, likayi kun angayan likayan aron wala na mo’y awayan.

Pero kun wala’y higayon nga siya mopahiyom o sweet kanimo, aw toxic iyang pagkatawo. Lisod na, kay mao na’y natural niya. Kun dili siya malipayon sa iyang kaugalingon, unsaon niya paglipay nimo nga iyang karelasyon. Andam ba ka mopadayon sa relasyon nga sige ka’g konsumisyon? Gani karon, nireklamo na ka, buot pasabot wala ka’y kalinaw ug kalipay kuyog niya. Kun gusto ka mausab siya,lakaw dayon palayo ini’g sapot labi na’g wala sa lugar, ingna apason lang ka kun kalma na siya. Mao ra man gihapon, kun magpabilin ka, tabla ra nga imong gipukpok imong ulo sa martilyo. Sa maong paagi, siya makaamgo nga duna’y utlanan ang iyang batasan. O dili ba kaha isikreto’g video kun sapoton na, unya ipakita kaniya kun mahuwasan na. Sa maong paagi makita niya iyang kaugalingon.

Apan paniid, sapoton ba dayon siya kun lahi iyang ka-istorya? Sama sa iyang mga higala ug pamilya, o dili ba kaha sa mga dagkong tawo sama sa labaw niya sa trabaho. Ka’y kun sa ubang tawo makapugong siya apan kanimo wala’y lipod lipod, usa ra ang pasabot ana, kanimo wala siya’y respeto.

Tito Miguel

* * *

Magpatambag ka? Ipada kang Tito Miguel: 0991-318-9366