Uyab nga palahubog

Dear Tito Miguel,

Maayong adlaw , ako diay si Ayessa , 24 anyos ug taga Mandaue City , Cebu . Aduna koy uyab nga akong gihigugma pag-ayo.  Siya si Robert John nga taga Barangay Guadalupe , Cebu City. Siya'y ka buwan nami nga nag-ipon og puyo.

Sa sinugdanan sa among relasyon, buotan ug responsable siya. Apan sa nilabay  nga mga bulan,  nagsige na siya ug inom o tagay  uban sa iyang mga barkada.  Halos kada gabii na siya mahubog ug usahay dili na mouli sa saktong oras. Kung mahubog siya, mausab iyang batasan, masuko dayon bisan gamay nga butang, ug usahay makasulti ug mga pulong nga makapasakit nako.

Kapila na ka higayon  nako siya giistoryahan nga dili maayo ang sobra nga pag-inom kay naapektuhan na among relasyon ug iyang trabaho. Moingon siya nga magbag-o siya, apan mobalik  gihapon sa . Kapoy na kaayo ko sige’g sabot ug pasaylo. Nahadlok pud ko nga basin mas grabe pa ang mahitabo sa umaabot.

Gihihugma  nako siya, apan usahay mangutana ko sa akong kaugalingon kung sakto pa bang magpabilin ko ani nga relasyon. Gusto ko siyang tabangan nga mausab, pero murag ako na man pud ang magkonsomisyon. Unsa may angay nakong buhaton? — Ayessa

* * *

Ayessa,

Dagha’y rason ngano magsige’g inom. Lingaw lang gyud siya, bata pa man, baskog pa. Posible sab ganahan siya makainom aron makapabuhagay siya sa iyang gibati. Wa ka maghisgot kun unsa iyang personality. Duna’y uban mauwawon kaayo apan ini’g kahubog kusog modiskurso. Outlet lang nila. Basin sab dili siya malingaw kanimo. Paniid kuno sa imong kaugalingon, basin boring ka o sige la’g pamadlong niya. Kun mora ra ka’g inahan nga sige’g disiplina niya, morebelde gyud na, mangita’g lingaw sa lain.

Inay nga imong hikawan sa iyang kalingawan, pasagdi lang apan pakuhai gamay, hangyoa nga ini’g gabii sa Biyernes o Sabado lang, kanang wala’y trabaho sunod adlaw. Mas malingaw siya ka’y wala’y hunahunaon nga sayohan pagka-ugma. Puwede sab nimo agnihon nga iyang magasto unta sa inom iya na lang tigomon. Ini’g labay sa tuig makugang na lang siya dako dako na man diay siya’g napundo, iyang lawas walq pa maabuso.

Sabota nga kun pila iyang natigom imong bayran, tigomon ninyo duha alang sa inyong kaugmaon o dili ba kaha mobiyahe mo kun duna’y okasyon, birthday o anniversary ba kaha ninyo. O dili ba kaha mag gym mo’ng duha aron ma- health conscious siya. Kun dili gihapon maminaw nimo, pasagdi lang. Dili pa man mo minyo. Arang arang na lang na kaysa drogas ba kaha o mamabaye siya. Pero kun para nimo sobra na, pangutan-a imong kaugalingon, kun lingaw gyud siya sa iyang bisyo, asa ka dapit sa iyang kasingkasing? Duna ba’y kaugmaon inyong relasyon kun inyong ipadayon? —Tito Miguel

Magpatambag ka? Ipada kang Tito Miguel: 0991-318-9366