Gamay’ng kalibutan - Gula 4

Gamay ra ang sweldo ni Ricky sa gitrabahoan niya nga bakery didto sa Zamboanga mao nga usahay dili kini makasapar sa ilang panggasto ni Diane. Usahay malibre sila kun makabisita kanila ang masi’g nila ka ginikanan kay mahatagan sila og hinabang.

“Ikaw man gud Ricky, nagdali-dali ka sa hukom nga magtipon na ta. Tan-awa nagkalisud-lisod na ta pag-ayo,” nahandum pa ni Ricky nga nagbagulbol si Diane usa ka higayon nga ang ilang bugas dili na paigo nga lutoon alang sa ilang panihapon.

Naghilak niadto si Ricky nga nagsud-ong ni Diane nga nasabot niya nga wala matagbaw sa gilugaw nila nga pipila ka kumkom na lang sa bugas. Pagkaugma sa buntag, wala’y nahimo si Ricky gawas nga nangutang sa duol nga tindahan aron duna sila’y ikapamahaw.

Gisaaran ni Ricky si Diane nga mangita’g laing trabaho nga maarang-arang og sweldo apan milabay na lang ang pipila ka buwan wala siya makakita’g laing trabaho. Dunay mga higayon nga ang gidala ra nga pan nga giutang ni Ricky sa bakery maoy ilang ipanihapon.

Dunay mga higayon nga namat-an ni Ricky ang iyang puyo-puyo nga maghilak panahon sa kaadlawon samtang magkuso-kuso sa ilang mga bulingon. “Nganong sayo ka man kaayo nanglaba Diane?” gipangutana ni Ricky ang iyang puyo-puyo.

“Sorry kaayo Rick, nakalimot ko nga bulingon na man diay ang imong uniporme sa bakery, wala nako malabhi pag-abut nimo kagabii. Sagdi lang mauga ra kini kay akong ipatungod sa electric fan,” hinay nga mga pulong gikan ni Diane.

Misamot ang gugma ni Ricky kang Diane tungod sa pagka-manggihuna-hunaon kaayo sa iyang obligasyon. Halos wala na matulog si Diane ug nagbuntag ra kini nga naninguha nga mauga ang uniporme ni Ricky sa bakery.

Hapit na alas sayes nga nakamata si Ricky ug nakita niya nga gibalik-balikan niini og utaw ang iyang uniporme aron mauga. “Na’ay giandam nako diha nga pagkaon Rick, pagmaneho na lang nianang buwad nato nga sud-an ha? Dili na man gud paigo ang kwarta kun mopalit pa ko og isda,” ni Diane.

Nakita ni Ricky nga nagpamahid sa mga mata si Diane samtang padayong nag-utaw sa iyang uniporme. Gibati ni Ricky ang dili tiaw nga kaluoy sa iyang puyo-puyo. Pagdayong lakaw ni Ricky, gibinlan niya’g hawok si  Diane.

Nakita g’yud ni Ricky nga mitubod ang mga luha ni Diane sa dayon niya nga pagtalikud. Wala masayod si Ricky nga kadto na maoy kataposan sa ilang panag-uban. Pagkahapon dihang miuli si Ricky nga nagbitbit og duha ka kilo nga bugas-humay ug lima ka buwad-tuloy, wala na si Diane sa balay. - Sumpayan