Dear Tita Salie,
Have a wonderful day. Tagoa lang ko sa pangalan nga Yuonni, 25 years of age ug usa ka dalaga. Ang akong problema mahitungod sa akong lovelife.
Duna ko’y boyfriend kaniadto, Tita, apan subo kaayong hunahunaon nga nagbulag na mi karon. Mahal kaayo nako kining tawhana. Ug wala gyod ko’y ikasulti nga bati ngadto kaniya tungod kay love man kaayo ko niya. Buotan kaayo siya ug responsable pa gyod nga tawo.
Nagkabulag lang gyod mi tungod sa hinungdan nga paryente ming duha. Nasubay man god sa among mga ginikanan ug mga katigulangan nga paryente ming duha. Matud nila nga dili maayo nga mag-unay ming duha. Busa wala kami’y mahimo kun dili ang sundon sila.
Tungod sa akong kaguol, Tita, akong nasugot si Jay nga dugay na nga nanguyab kanako. Wala ko mahigugma ni Jay apan ako lang siyang gisugot aron malingaw ko. Pero nahigugma lang gihapon ko sa akong ex.
Tungod kay wala ko’y gugma ni Jay dili gyod ko pa-kiss niya kay palahubog man pod siya. Unya gusto na ra ba niyang makigminyo nako bisan pa man kun bag-uhay ko lang siyang gisugot.
Naglibog ko kun unsay akong buhaton. Palihog pasabta ko. Daghang salamat and God bless.
-- Yuonni
* * *
Hi, Yuonni,
Kumosta ang buhay? Ang nahitabo kanimo or ang imong gibati karon sa imong bag-ong uyab naghatag kanimo og pagtulon-an nga dili gyod nato puydeng ilaron ang atong kasingkasing. Ug dili gyod maayo nga imong gamiton ang laing tawo. Ayaw anara ang imong kaugalingon nga mogamit og laing tawo kay ang tawo dili kahimanan.
Ug dili ka gyod ganahan nianang imong uyab karon tungod kay wala ka man mahigugma kaniya. Lahi gyod ang relasyon nga adunay gugma, ug lami kaayong gakson ug hagkan ang tawo nga atong gihigugma. Busa ayaw ilara ang imong kaugalingon, mas maayo pa siguro kun imong sultian sa tinuod si Jay tungod kay sa inyong sitwasyon siya man ang makalulooy. Nagdahom siya nga duna kay gugma kaniya apan ang tinuod diay niini imo lamang siyang gigamit aron makuhaan ang kaguol nga anaa sa imong dughan.
Subaya usab ang inyong pagkaparyente sa imong hinigugma kaniadto kay tingali kun layo na kini kay adunay giusab karon sa atong balaod sa simbahan. Gikan sa 3rd degree pataas puyde na minyoon. 1st and 2nd degree cousin ang dili puyde. Apan kinahanglan nimo kining ipasabot sa inyong mga katigulangan.
-- Tita Salie