Dear Tita Salie,
Maayong adlaw. Bag-o lang ko nga tigbasahan sa imong column. Usa ka adlaw nakagunit ko og Banat News ug didto ko makahibalo nga tigtambag ka diay sa mga problema sa ubang tawo nga mangayo kanimo og panabang. Ug samtang nagsige ko og basa sa imong mga tambag akong nahunahunaan ang akong kahimtang “unsa kaha kun magpatambag pud ko.” Busa, mao kining namasin ko nga imo kong matabangan sa akong suliran.
Tagoa lang ko og Ms. Scorpio usa ka dalaga apan dunay ka-live in nga tawgon lang nato og Mr. Aries.
Taudtaod na kami nga nagtipon ug usa ra gyod ka butang ang hinungdan sa among lalis o away. Sobra gyod ang pagkaseloso ni Mr. Aries, Tita, to the point dili na ko kaduol o katagad sa akong mga amigo. Ug magduhaduha na usab ang akong mga amigo nga moduol nako tungod kay nasayod na man sila sa batasan ni Mr. Aries.
Kun duna gani koy ikaestorya nga lalaki bisan ako ra kining ig-agaw maglalis na dayon mi kay iya man kong pugson pagpatug-an kun ako bang uyab ang akong gikasulti. Dili usab ako puydeng molakaw nga ako ra kay moingon man siya nga muadto na sad ko sa akong laki. Gikapoy na gyod ko sa akong sitwasyon. Palihug pasabta ko, Tita. Thank you and God bless. -- Ms. Scorpio
* * *
Dear Ms. Scorpio,
Lisud gyud kaayong i-handle ug ikauban ang tawong seloso. Kanunay nga magduhaduha ka na sa imong buhaton kay anaa na man sa imong hunahuna ang kahadlok nga tingali og dili kini mauyonan sa imong partner. Dili kana dalidaling makaduol sa imong mga friends ug maglisod na usab sila pagduol kanimo sa paglikay nga mag-away mo. Ang mahitabo niini nga likayan kana sa imong mga amigo ug klaro na kaayo nga dili gyod kini maayo. Ang imong feeling mora og kanunay ka nang nasakal ug maglisod kana paglihok.
Ayaw siya pasagdi kay ang pagkaseloso mora kini og sakit sa tawo kinahanglan kini nga matambalan ug kamo rang duha ang makatabang niini.
Kanunay siyang pakig-estoryahe nga ihatag kanimo ang pagsalig isip timaan nga nahigugma siya kanimo. Hangyoa siya nga mosalig kanimo kay gimahal nimo siya. Kanunay siyang ikuyog sa imong lakaw nga daghang tawo aron maanad siya. Ipailaila siya sa imong mga friends nga babaye aron makasabot siya nga wala’y problema ug wala’y kadudahan sa lalaki ug babaye nga managhigala.-- Tita Salie