Dili kaigo ang budget

Dear Tita Salie,

Maayong adlaw. Naaghat gyod ko pagsulat niining akong problema kay mamasin ko nga imo kong matabangan tungod sa kalisod sa among pagpuyo karon.

Tagoa lang ko sa pangalan nga Ms. Ann, minyo ug nagtrabaho ko isip usa ka tindera og school supplies diri sa among lungsod.

Tungod sa kawad-on ug kalisod sa pagpuyo nitipon na lang mi sa balay sa akong mga ginikanan tungod kay kun molain mi ug mag-abang sa among puy-anan mas mosamot gyod ang among kalisod. Kay sa pagkaon pa lang daan kuwang ra gyod ang among income.

Gamay ra kaayo ang akong sweldo isip tindera. Ug akong bana sa construction ra pod intawon magtrabaho. Busa ang among kita kada adlaw igo ra gyod sa among inadlaw-adlaw nga panginahanglan. Wala na gyoy mosobra pa. Gusto unta ko nga maglain pagpuyo apan dili gyod kaigo alang sa abangan matag bulan.

Gusto unta ko mobalhion og trabaho, Tita, kanang dakudako og sweldo. Apan unsa mang trabahoa ang mohatag og dagkong sweldo? Unsaon man nako pag-apply niini? Palihog pasabta ko. Thank you very much and more power. -- Ms. Ann

* * *

Dear Ms Ann,

Maayong adlaw usab, Ms. Ann. Adunay daghang mga tawo nga dagko og sweldo o income matag bulan. Apan atong makit-an nga kanunay lang gihapon silang kapos sa budget tungod kay dunay daghang bayranan. Mahitabo gyod kini depende sa lifestyle sa usa ka tawo. Kun mogasto kita og labaw sa atong kita matag-adlaw kanunay gyod kitang makulangan sa kwarta. Busa kinahanglan gyod ang disiplina sa kaugalingon ug sa matag sweldo nga moabot ato gyong gahinan bisan gamay kaayo alang sa atong pundo.

Pero dili usab nato ikalimod ang kamatuoran nga dunay mga sweldo matag bulan nga gamay gyod kaayo ug kulang gyod alang sa atong adlaw-adlaw nga panginahanglan. Tinuod nga ang imong sweldo gamay ra gyod ug wala nay sobra alang sa savings.

Pero kun mangita ka og dagkong sweldo nga trabaho, yes, adunay daghan apan tag-as usab og qualification ang pangitaon. Kinahanglan graduate ka sa college ug dunay taas nga experience o kasinatian sa maong trabaho, gani ang ubang tag-as og naeskuylahan maglisod pa pagsulod.

Puyde siguro nga mangita mo og sideline, sama sa negosyo. Bisan kun ginagmay lang sama sa candy ug sigarilyo, utanon, prutas, trapo, ice candy etc. bisan unsa lang basta dunay madugang nga kwarta alang sa pamilya. -- Tita Salie