Dear Tita Salie,
Maayong adlaw. Usa ko sa mga tigbasahan sa imong column ug ganahan kaayo ko mobasa kay duna man ko’y daghang makat-onan.
Tagoa lang ko sa pangalan nga Ms. Scorpio, dili pa kasal apan nag-antos ko sa batasan niining akong kapuyo karon. Manghinaot lang intawon ko, Tita Salie, nga imo kong matabangan kay medyo nabug-atan na gyud ko niini.
Nahasol na ko niining batasan sa akong kapuyo o katipon kay mora og sobra na gyud ang iyang pagka-seloso ug ang iyang kasaputon. Saputon nga wala sa lugar ug wala’y igong rason. Gusto niya nga siya na lang gyud ang akong tagdon bisan pa man kun ako na nga gibuhat ang tanan aron ako siyang matagad.
Usahay dili na gani nako maasikaso ang akong kaugalingon tungod kay siya gyud ang akong unahon. Apan saputon lang gihapon ug kanunay lang ko niyang awayon. Dili lang away ang madawat nako iya pa gyud kong dapatan kanunay. Sakit gyud kaayo alang kanako physically ug emotionally ug halos dili ko na gyud makaya.
Palihog pasabta ko, Tita Salie, kun unsay angay kong buhaton. Daghang salamat sa imong pagtagad. More power and may God bless you always.
* * *
Hello, Ms. Scorpio,
Mas makatabang gyud sa inyong relasyon o sa usa ka relasyon kun ang matag usa mogahin og panahon aron tun-an ang batasan sa ilang partner. Nindot gyud kaayo ang samahan sa magtiayon kun silang duha suheto sa batasan sa usa’g-usa. Pananglitan ang bana ang gisapot o nasuko, dapat kahibalo ang iyang asawa kun unsay approach nga gamiton aron dili na mosamot ang kasuko sa iyang bana ug nga dali ra kining maulian.
Apan dili pa ulahi ang tanan. Ug segurado ko nga kaya pa nimo. Tungod kay ako mituo nga wala’y ihatag ang Dios ngadto sa tawo kun kini dili niya kayang dalhon. Busa may panahon pa aron imong tun-an ang kinaiya sa imong partner. Ilha siya ug pangitaa ang iyang kiliti, tun-i kun unsaon aron mopahiyom siya.
But, generally, base sa akong knowledge sa mga lalaki, duna sila’y common nga kiliti, duna sila’y common nga weakness. Ug dapat ato kining mahibaw-an aron dili na unya lisud ang pagpakigsulti sa atong mga bana.
Imong pakig-estoryahan ang imong bana mahitungod sa imong problema kaniya sa paraygon nga paagi. Of course, dapat lambing ang imong tingog, dili masuk-anon. Kun duna kay ihangyo kaniya siguradoa nga bugnaw ug linaw ang iyang hunahuna. Ug matud pa sa usa ka source author nga ang labing the best nga moment is after sex ninyo. Kay linaw ug bugnaw gyud ang hunahuna sa imong partner. Iapil unya sa imong hangyo kun maayo na ang inyong relasyon, ang mahitungod unya sa inyong kaminyoon. -- Tita Salie