Gula 150
“Kun mao, wa na diay tay problema,” matud ni Angeline. “Nagbuwag na man sab mi si Robert.”
Naggakos na sab sila. Ug nag-akob ang ilang mga ngabil.
Miabot ang laing tuig tingtungha, mipadayon pag-eskuyla si Angeline. Niining higayona daw kinamayan na ang ilang mga adlaw. Malipayon kaayo siya sa relasyon nila ni Erik.
Usa niana ka adlaw’ng Sabado, nanuroy sila si Erik ug Angeline. Nangadto sila sa Hinagdanan Cave, unya niadto sila sa Loboc ug nanakay og bangka sa Loboc River. Nagpakuha pud sila og hulagway sa Sandugo site sa Loay unya nangaligo sila og dagat sa Palo Beach.
Sa pagpauli nila sa Tagbilaran, gihatod ni Erik si Angeline ngadto sa ilang boarding house. Sa wala pa mosulod si Angeline sa boarding house, nag-estorya una sila si Erik ug kadiyot.
Kalit lang mitungha si Almina nga nagbitbit og pistola nga may silencer. Gitumong niini ang armas ngadto kang Angeline.
“Dili mo maangkon si Erik, Angeline,” nagkanayon si Almina. “Wa nimo, wa nako! Mamatay ka!”
“Ayaw!” Tuaw ni Erik nga kalit lang miali kang Almina.
Tsug! Tsug! Tsug! -- Sumpayan pa