Gula 148
Wala magdahom si Angeline nga kalit mahitungha si Erik sa ilang dapit. Wala siya masayod kun nganong nakatultol kini sa ilang gipuy-an. Wala na siya makahimo paglikay sa ulitawo.
“We need to talk,” nagkanayon si Erik.
“Wa na tay angay pang panagsultihan,” tubag ni Angeline.
“Aduna, Angeline. Di mahimong mag-ingon ini lang ta hangtod sa hangtod. Kinahanglang magprangkahay ta kun unsay tinuod natong gibati sa usa’g-usa!”
Na-realize ni Angeline nga dili masulbad sa hingpit ang problema kun magpadayon siya paglikay ni Erik. Kinahanglan tuod nga magkadayganay sila aron matapos na ang tanang mga komplikasyon.
“I love you, Angeline,” matud ni Erik. “Tuohi ko. Tinud-anay ang akong tinguha diha nimo. Ikaw ang babayeng matuod kong gihigugma.”
“Unsaon nako pagtuo sa imong gisulti nga nakigrelasyon ka man kang Almina?” Pangutana ni Angeline.
“Si Almina ang akong gipahungawan sa akong gibati diha nimo. Niadtong panahona wa koy kaisog sa pagpadayag sa akong gugma diha nimo tungod sa kahadlok nga maguba ang atong paghinigalaay kun mangahas gyud ko sa pagpanguyab nimo. Maong si Almina ang nabuthan sa tanan. Pero di ko malipayon sa among relasyon kay ikaw ang matuod kong gimahal, Angeline.” -- Sumpayan pa