Gula 95
Libang si Salie sa iyang trabaho. Matag adlaw magsulat siya alang sa iyang lindog, mangalap og lab-as nga mga balita ug mag-edit sa mga balita nga sinulat sa ilang mga reporter ug koresponsal.
Inanay na untang napala sa iyang panumdoman ang nahitabo sa iyang igsuon, dihang nabalitaan niya nga kaslonon si Roger Justiniano — ang lalaki nga nakasala sa iyang manghod. Nabasahan niya kini sa panid sa mga anunsiyo sa Moon-Star Daily. Ang kasal adto himuon sa simbahan sa Guadalupe.
Magminyo na diay ang banyaga! Milugan-ob kining mga pulonga sa kahiladman ni Salie. Nahinumdom siya sa gibuhat sa maong lalaki sa iyang manghod. Si Roger Justiniano ang nakaingon sa kamatayon sa iyang igsuon.
Dihay kalit mitumaw sa hunahuna ni Salie. Unya iyang gihukman nga kini iyang buhaton. Kini ray paagi aron magmalinawon na sa hingpit ang kalag sa iyang manghod.
Ug miabot ang adlaw sa gitakdang kasal nilang Roger Justiniano ug Lorrene Delampes. Adlaw’ng Domingo kadto — alas nuybe sa buntag. Ang mga tawo nagpunsisok sa dakong simbahan sa Guadalupe.
Matahom ang sulod sa balay alampoanan tungod sa nagkadaiyang mga bulak nga gisulod sa gagmay’ng mga basket nga gipahiluna pagbutang diha sa kinatung-ang bahin sa wanang sa simbahan nga mitadlas gikan sa nag-arkong ganghaan paingon sa tiilan sa dakong altar.
Kalma kaayo nga misulod si Salie sa simbahan. Miliotliot siya sa daghang mga tawo aron mahiduol pag-ayo sa kaslonon nga nagbarog sa tiilan sa altar nga gitaliwad-an sa ilang mga ginikanan. Misurok ang iyang dugo nga nagtan-aw sa lalaki nga malipayon kaayong nagbarog tupad sa iyang pangasaw-onon. -- Sumpayan pa